रत्नागिरी तालुक्यातील मिरजोळे गावातील तरुणीचा आंबा घाटात खून करून मृतदेह दरीत फेकल्याची धक्कादायक घटना समोर आली आहे. प्रेमप्रकरणातून हा खून झाला असून प्रियकराने तो केला असावा अशी चर्चा मिरजोळे आणि आसपासच्या परिसरात सुरू आहे. दरम्यान या खून प्रकरणात एकूण तिघांचा सहभाग असल्याची माहिती पोलीसांना मिळाली असून या तिघांनाही चौकशीसाठी ताब्यात घेण्यात आले आहे. शनिवारी सायंकाळी उशीरापर्यंत त्यांची कसून चौकशी सुरू होती. दुर्वास दर्शन पाटील (वय २६, रा. खंडाळा, रत्नागिरी) हा मुख्य आरोपी असून त्याच्यावर भारतीय न्याय संहिता कलम १०३ अन्वये गुन्हा दाखल करण्यात आला आहे. अन्य दोघांनाही चौकशीसाठी ताब्यात घेण्यात आले आहे, अशी माहिती पोलीसांनी पत्रकारांना दिली.
तरूणी बेपत्ता – संबंधित तरूणी गेल्या १० दिवसांपासून बेपत्ता होती. पोलीस तिचा शोध घेत असताना हा प्रकार उघडकीस आला असून पोलीसांनी तिच्या कथित प्रियकरासह याकामी त्याला मदत करणारे अन्य दोघे अशा एकूण ३ आरोपींना चौकशीसाठी ताब्यात घेतले आहे. खंडाळा परिसरातील हे संशयित आरोपी आहेत. हा खून उघडकीस येताच मिरजोळे तसेच खंडाळा परिसरात खळबळ उडाली असून चर्चाना पेव फुटले आहे.
फेसबुकवर झाली ओळख – पोलीसांनी पत्रकारांना दिलेल्या अधिक माहितीनुसार, मृतावस्थेत सापडलेल्या तरुणीचे नाव कु. भक्ती जितेंद्र मयेकर (वय २२, रा. मिरजोळे) असे आहे. तिचे संशयित आरोपी दुर्वास दर्शन पाटील या तरूणाशी प्रेम जुळले होते. खंडाळा परिसरातील हा तरूण असून या दोघांची ओळख काही महिन्यांपूर्वी फेसबुकवर झाली होती. ओळख हळूहळू प्रेमसंबंधात बदलली; मात्र कुटुंबीयांचा विरोध आणि परस्परांतील वादामुळे या नात्यात तणाव निर्माण झाला होता, असे चर्चिले जाते. झाली
लग्न करण्याचे आश्वासन – या तरूणाने भक्तीला लग्नाचे आश्वासन दिले होते. १० दिवसांपूर्वी भक्ती जितेंद्र मयेकर ही तरूणी घरातून अचानक गायब झाली. तिचा सर्वत्र शोध सुरू होता. मात्र ती न सापडल्याने हरवल्याची तक्रार पोलीस स्थानकात नोंदविण्यात आली. ती दोघं आंबा घाट परिसरात गेली. याच निर्जन भागात तिचा खून करून मृतदेह खोल दरीत फेकून दिल्याचा अंदाज पोलीसांनी वर्तविला आहे.
शोधमोहीम आणि उलगडा – भक्ती ही १० दिवसांपूर्वी घरातून बेपत्ता झाली होती. कुटुंबीयांनी तत्काळ पोलिसात तक्रार दाखल केली होती. बेपत्ता तरूणीचा शोध सुरू होता. याचदरम्यान तिचे आणि तिच्या कथित प्रियकराचे भांडण झाले असावे, असे बोलले जात आहे. आरोपीने तिची फसवणूक केल्याचे लक्षात आल्यानंतर या दोघांमध्ये भांडण झाले आणि याच रागातून त्याने तिचा खून केला व पुरावा नष्ट करण्यासाठी आंबा घाटातील खोल दरीत फेकून दिला असावा अशी चर्चा सुरू आहे. याकामी आरोपीला त्याच्या अन्य दोन मित्रांनी मदत केली, असेही हळूहळू तपासातून पुढे आले आहे. तपासादरम्यान तिचे सोशल मीडियावरील संबंध उघडकीस आले. त्त्यानंतर पोलिसांनी संशयित आरोपीला ताब्यात घेतले. सुरुवातीला त्याने उडवाउडवीची उत्तरे दिली; परंतु पोलिसांच्या कठोर चौकशीनंतर त्याने गुन्ह्याची कबुली दिल्याचे पोलिसांनी सांगितले.
मृतदेह सापडला – शनिवारी पोलिस आणि कुटुंबीयांनी आंबा घाटात शोध घेतला असता दरीत भक्तीचा मृतदेह सापडला. चेहरा विद्रूप झाल्यामुळे ओळख पटवणे कठीण होते; मात्र तिच्या हातावरील टॅटूमुळे ओळख निश्चित करण्यात आली, अशी माहिती पोलीसांनी दिली.
तिघांचा सहभाग ? – ३ जणांनी हा खून केला असून त्या तिघांनाही पोलीसांनी चौकशीसाठी ताब्यात घेतले आहे. या घटनेमुळे मिरजोळे आणि खंडाळा परिसरात शोक व संतापाचे वातावरण पसरले आहे. पोलिसांनी मृतदेह ताब्यात घेऊन शवविच्छेदनासाठी पाठविला आहे. गुन्हा अन्वेषण पथक या प्रकरणाचा सखोल तपास करीत असून आरोपींवर कठोर कारवाई होणार असल्याचे पोलिसांनी स्पष्ट केले आहे.
