गुहागर विधानसभा मतदारसंघ हा आमचा हक्काचा मतदारसंघ आहे. महायुती म्हणून लढताना तो आम्हाला मिळाला पाहिजे. हक्काच्या मतदारसंघावर देखील शिवसेना दाबा करणार असेल आणि तो लढवण्यावर ठाम असेल तर मग महायुतीला अर्थ काय? ‘आम्हीही गुहागरसह चिपळूण, दापोली-खेड- मंडणगड या मतदारसंघातही निवडणूक लढवू असा इशारा भाजपच्या कार्यकर्त्यांनी दिला आहे. त्यामुळे महायुतीत गुहागरच्या जागेवरून वाद पेटण्याची शक्यता आहे. जिल्ह्यातील ५ मतदारसंघांपैकी गुहागर-चिपळूण-खेड विधानसभा मतदारसंघ महायुतीच्या जागा वाटपात भाजपला मिळेल अशी अपेक्षा कार्यकर्त्यांना होती, अजूनही आहे.
केवळ दावा करून शिवसेना थांबली नाही तर मुख्यमंत्री एकनाथ शिंदे यांचे सुपुत्र खा. श्रीकांत शिंदे यांचे मेहूणे विपूल कदम यांना उमेदवारी देण्यात येणार असल्याचेही सांगितले जावू लागले आहे. २०१९च्या विधानसभा निवडणुकीत या मतदारसंघात शिवसेनेचा उमेदवार निवडून आला आहे. शिवसेनेचा उमेदवार धनुष्यबाण चिन्हावर या मतदारसंघातून विजयी झाला आहे. आज येथील आमदार शिंदेंच्या शिवसेनेसोबत नसले तरी मतदारसंघ त्यावेळी शिवसेनेने जिंकला होता आणि त्या बळावर गुहागर मतदारसंघावर आम्ही दावा करत आहोत. शिवसैनिकाला येथून उमेदवारी मिळेल असे शिवसैनिकांचे म्हणणे आहे.
तर ५ पैकी एकाही मतदारसंघात मित्रपक्ष म्हणून भाजपला संधी मिळणार नसेल तर महायुती काय कामाची? गुहागरची जागा हक्काची आहे ती मिळणार नसेल तर आम्ही चिपळूणसह खेड-दापोली-मंडणगडसह गुहागर अशा तिनही मतदारसंघांमध्ये स्वबळावर लढू असा इशारा दापोलीतील भाजपच्या कार्यकर्त्यांनी दिला आहे. या मुद्यावरून आता भाजप आणि शिवसेना कार्यकर्त्यांमध्ये चांगलीच जुंपली असून या मतदारसंघांबाबत दोन्ही पक्षांचे वरिष्ठ नेते काय निर्णय ‘घेतात याकडे राजकीय वर्तुळाचे लक्ष लागले आहे.
