चिपळूण: चिपळूण–धामणंद मार्गावर दोन एसटी बसेसची समोरासमोर जोरदार धडक झाल्याची अत्यंत दुर्दैवी घटना घडली आहे. या भीषण अपघातात दोन्ही बसेसमधील १८ प्रवासी, २ चालक आणि १ वाहक (कंडक्टर) असे एकूण २१ जण जखमी झाले आहेत. खांदाट गवळवाडी येथील चिरणी फाट्यानजीक शनिवारी दुपारी ३ वाजण्याच्या सुमारास ही दुर्घटना घडली.
नेमकी घटना कशी घडली?
मिळालेल्या माहितीनुसार, चिपळूण आगारातून एक एसटी बस प्रवाशांना घेऊन चोरवणेच्या दिशेने निघाली होती. त्याच वेळी कासईहून दुसरी एसटी बस चिपळूणच्या दिशेने येत होती. दोन्ही बसेस खांदाट गवळवाडीतील चिरणी फाट्याजवळ आल्या असता, रस्त्यावरील तीव्र उतार आणि धोकादायक अंध वळणामुळे चालकांचे वाहनावरील नियंत्रण सुटले आणि दोन्ही बसेस समोरासमोर एकमेकांवर जोरदार आदळल्या.
धडक इतकी भीषण होती की दोन्ही वाहनांच्या पुढील भागाचा चक्काचूर झाला. अचानक झालेल्या या जोरदार आघातामुळे बसमधील प्रवासी थेट पुढील सीट आणि काचांवर आपटले. बहुतांश प्रवाशांच्या डोक्याला, जबड्याला, तोंडाला आणि हनुवटीला गंभीर दुखापती झाल्या असून काही प्रवासी रक्तबंबाळ झाले होते.
ग्रामस्थांचे तातडीने मदतकार्य
अपघाताचा मोठा आवाज ऐकताच परिसरातील स्थानिक ग्रामस्थ आणि खांदाट गवळवाडीतील तरुणांनी क्षणाचाही विलंब न लावता घटनास्थळी धाव घेतली. नागरिकांनी अत्यंत प्रसंगावधान राखून बसेसमध्ये अडकलेल्या आणि वेदनेने विव्हळणाऱ्या प्रवाशांना खिडक्या व दरवाजांतून सुखरूप बाहेर काढले. जखमींमध्ये ज्येष्ठ नागरिक व महिलांचाही समावेश होता.
स्थानिकांनी तातडीने रुग्णवाहिका व खासगी वाहनांची व्यवस्था करून सर्व २१ जखमींना तात्काळ कामथे येथील उपजिल्हा रुग्णालयात उपचारासाठी दाखल केले. डॉक्टरांचे पथक सध्या सर्व जखमींवर तातडीने उपचार करत असून सर्वांची प्रकृती स्थिर असल्याचे सांगण्यात येत आहे.
पोलिसांकडून पंचनामा व तपास सुरू
दुर्घटनेची माहिती मिळताच चिपळूण पोलीस ठाण्याचे पथक घटनास्थळी दाखल झाले. पोलिसांनी अपघातग्रस्त बसेस बाजूला करून मार्गावरील विस्कळीत झालेली वाहतूक पूर्ववत केली. या प्रकरणी पोलिसांनी पंचनामा केला असून, हा अपघात नेमका तांत्रिक बिघाडामुळे झाला की वळणावरील अतिवेगामुळे, याचा अधिक तपास चिपळूण पोलीस करत आहेत.
