बॉलिवूड विश्व पुन्हा एकदा कोरोनाच्या विळख्यात अडकले आहे. दिग्दर्शक-निर्माता करण जोहर याच्या ५० व्या वाढदिवसाच्या पार्टीनंतर अनेक बॉलिवूड कलाकार कोरोना पॉझिटिव्ह झाल्याचे समोर आले आहे. आता अभिनेता शाहरुख खान यालाही कोरोनाची लागण झाल्याचे समोर आले आहे.
अद्याप मुंबई महानगर पालिका किंवा शाहरुख खान यांनी स्वतः या विषयी कोणतीही अधिकृत माहिती दिलेली नाही. शाहरुखचा मुलगा अबराम याला देखील कोरोनाची लागण झाली असल्याचे बोलले जात आहे. गेल्या वर्षी एप्रिल महिन्यात यशराज स्टुडिओच्या ‘पठाण’ चित्रपटाच्या मुंबईत सुरू असलेल्या शूटिंग दरम्यान सेटवर अनेक जण कोरोना पॉझिटिव्ह आढळले होते. अशा परिस्थितीत चित्रपटाचे शूटिंग थांबवावे लागले होते.
शाहरुख खान व्यतिरिक्त अभिनेत्री कतरिना कैफ हिला देखील कोरोनाची लागण झाली आहे. कतरिना कैफ कोरोनाच्या विळख्यात अडकण्याची ही पहिलीच वेळ नव्हती, २०२१ मध्येही कतरिना कैफ कोरोना पॉझिटिव्ह झाली होती. आयफा सोहळ्यात पुरस्कार स्वीकारण्यासाठी पोहोचलेल्या विकी कौशलसोबत कतरिना देखील अबुधाबीला जाणार होती. पण, कोरोनामुळे ती विकीसोबत अबुधाबीला जाऊ शकली नसल्याचे म्हटले जात आहे. आता कतरिनाचा ७ दिवसांचा क्वारंटाईन कालावधी संपला असून, ती पुन्हा कोरोना निगेटिव्ह झाली आहे.
शाहरुख खान आणि कतरिना कैफ व्यतिरिक्त, बॉलिवूड स्टार कार्तिक आर्यन याला देखील कोरोनाची लागण झाली आहे. शुक्रवारी स्वतः कार्तिक आर्यनने ट्विट करून तोही कोरोना पॉझिटिव्ह असल्याची माहिती दिली. त्याने ट्विट करत लिहिले, ‘सर्व काही इतके पॉझिटिव्ह होत होते की, कोरोनालाही राहावले नाही’ कार्तिक आर्यनने आयफामध्ये डान्स परफॉर्मन्स देण्यासाठी पूर्ण तयारी केली होती, पण कोरोनामुळे त्याला आयफामधील परफॉर्मन्स रद्द करावा लागला.
बॉलिवूड अभिनेता आदित्य रॉय कपूरलाही सध्या कोरोनाची लागण झाली आहे. लवकरच त्याचा अ‍ॅक्शनपॅक्ड चित्रपट ‘ओम’ प्रदर्शित होणार आहे, ज्याचा टीझर नुकताच प्रेक्षकांच्या भेटीला आला आहे. पण आता कोरोनामुळे त्याच्या चित्रपटाच्या प्रमोशन प्लॅनमध्येही बदल झाला आहे.
