दोन्ही शिवसेनेत आता नवा वाद उफाळला आहे. शहरातील साळवी स्टॉप येथील शिवसेना शाखा कोणाची ? उद्धव बाळासाहेब ठाकरे शिवसेनेची की, शिंदे शिवसेनेची असा वाद रंगला आहे. यावरून ठाकरे गटाचे नवनियुक्त रत्नागिरी तालुकाप्रमुख शेखर घोसाळे यांनी या शाखेतून कार्यकर्त्यांच्या शुभेच्छा स्वीकारून कार्याला सुरुवात करणार असल्याची भूमिका घेतली तर शिवसेनेत नुकताच प्रवेश केलेले बंड्या साळवी यांनी मात्र सामंजस्याची भूमिका घेतली. काही दिवसांपूर्वीच गेली १७ वर्षे शिवसेनेचे (उबाठा) तालुकाप्रमुख म्हणून काम केलेले बंड्या साळवी यांनी शिवसेनेचे नेते आणि उद्योगमंत्री उदय सामंत यांच्या उपस्थितीत शिवसेनेत प्रवेश केला. त्यांच्यासोबत स्थानिक स्वराज्य संस्थेतील अनेक सदस्य, पदाधिकाऱ्यांनी प्रवेश करत उबाठाला धक्का दिला. त्यांच्या प्रवेशामुळे रिक्त झालेल्या रत्नागिरी तालुकाप्रमुखपदी तत्काळ शेखर घोसाळे यांनी नियुक्ती केल्याचे पत्र काल रात्री दिले.
त्यांच्या या नियुक्तीनंतर साळवी स्टॉप येथील शाखा कोणत्या शिवसेनेची, असा नवा वाद सुरू झाला आहे. यावरून शेखर घोसाळे यांची भेट घेतली असता ते म्हणाले, साळवी स्टॉप शिवसेना शाखा ही बाळासाहेब ठाकरे यांच्या कारकिर्दीत स्थापन करण्यात आली आहे. याच शाखेतून शिवसेनेने कारभार चालवला. आता आपण आपल्या कारभाराची सुरवातदेखील याच शाखेतून कार्यकर्त्यांच्या शुभेच्छा स्वीकारून करणार. उद्या (ता. २९) सायंकाळी पाच वाजता साळवी स्टॉप शाखेत उद्धव बाळासाहेब ठाकरे सेनेचे एक हजार कार्यकर्ते आपल्याला शुभेच्छा देण्यासाठी हजर राहणार आहेत. त्या स्वीकारण्यासाठी आपण शाखेत हजर राहणार आहे. भविष्यात याच शाखेतून आपण कारभार सुरू ठेवणार.
आमची मने दुभंगलेली नाहीत – यावर प्रतिक्रिया देताना शिंदे शिवसेनेचे नेते बंड्या साळवी म्हणाले, तालुकाप्रमुख शेखर घोसाळे यांनी शाखेत यावे त्यांचे स्वागतच असेल. त्यांनी यावे शुभेच्छा स्वीकारव्यात. त्यांनी त्यांचे काम काम करावे आम्ही आमचं काम करू. आम्ही दोघं वेगवेगळ्या पक्षात असलो तरी आमची मन दुभंगलेली नाहीत, अशी प्रतिक्रिया साळवी यांनी दिली.
