दिवाळीचा सण तोंडावर आला की, घराघरांत गोडधोडाचा सुवास दरवळू लागतो आणि त्याचबरोबर ओढ लागते ती आपल्या मूळगावी जाऊन कुटुंबियांसोबत सण साजरा करण्याची. नोकरी, व्यवसाय आणि शिक्षणाच्या निमित्ताने रत्नागिरीत स्थायिक झालेले पश्चिम महाराष्ट्र, मराठवाडा व विदर्भातील नागरिक सणानिमित्त मोठ्या संख्येने आपल्या गावी रवाना होतात. चाकरमान्यांचा हा परतीचा प्रवास सुलभ, सुरक्षित आणि गर्दीच्या त्रासाविना व्हावा, यासाठी महाराष्ट्र राज्य मार्ग परिवहन महामंडळाच्या (एसटी) रत्नागिरी विभागाने कंबर कसली आहे.
दिवाळी सणाच्या पार्श्वभूमीवर प्रवाशांची अतिरिक्त गर्दी लक्षात घेऊन रत्नागिरी एसटी विभागामार्फत ६ नोव्हेंबर ते १४ नोव्हेंबर या कालावधीत ३५० विशेष बसेस चालवण्याचा महत्त्वपूर्ण निर्णय घेण्यात आला आहे. दररोज सुमारे ३५ विशेष गाड्या विविध मार्गांवर सोडल्या जाणार असून, प्रवाशांच्या सोयीसाठी या फेऱ्यांचे ऑनलाइन आरक्षण (Online Booking) आता खुले करण्यात आले आहे.
शाळा-महाविद्यालयांना सुट्ट्या, गावी जाणाऱ्यांची लगबग सुरू
येत्या ५ नोव्हेंबरपासून शाळा आणि महाविद्यालयांना दिवाळीची सुट्टी जाहीर होत आहे. त्यामुळे कोकणात वास्तव्यास असणाऱ्या नागरिकांचे गावाकडे जाण्याचे नियोजन सुरू झाले आहे. प्रवासासाठी आजही सर्वसामान्य नागरिकांची पहिली पसंती ही आपल्या लाडक्या ‘लालपरी’लाच असते. ऐन सणात ऐनवेळची धावपळ आणि तिकिटांची मारामार टाळण्यासाठी प्रवाशांनी आधीच आपले तिकीट आरक्षित करून घ्यावे, असे आवाहन एसटी प्रशासनाकडून करण्यात आले आहे.
कोणकोणत्या मार्गांवर धावणार या विशेष बसेस?
रत्नागिरीतून सुटणाऱ्या या जादा बसेस प्रामुख्याने खालील जिल्ह्यांसाठी धावतील:
-
पश्चिम महाराष्ट्र: पुणे, सांगली, सातारा, कोल्हापूर आणि सोलापूर.
-
मराठवाडा: धाराशिव (उस्मानाबाद) व बीड.
-
विदर्भ: नागपूर, अमरावती, अकोला, वाशिम, यवतमाळ, चंद्रपूर, बुलढाणा आणि वर्धा.
शासकीय सवलतींचा लाभ; पण ‘हे’ कार्ड सोबत बाळगणे आवश्यक!
दिवाळीच्या या प्रवासात प्रवाशांना शासनाच्या नियमित सवलतींचा पूर्ण लाभ मिळणार आहे:
-
महिला व तरुणी: तिकीट दरात ५०% सवलत.
-
ज्येष्ठ नागरिक (६५ ते ७५ वयोगट): ५०% सवलत.
-
७५ वर्षांवरील ज्येष्ठ नागरिक: १००% मोफत प्रवास.
महत्त्वाची सूचना: या सर्व सवलतींचा लाभ घेण्यासाठी प्रवाशांकडे ‘एनसीएमसी’ (NCMC) कार्ड असणे बंधनकारक करण्यात आले आहे. प्रवाशांनी प्रवासापूर्वी आपले कार्ड सोबत ठेवावे आणि ते रिचार्ज करून घ्यावे. अन्यथा ऐनवेळी संपूर्ण तिकिटाची रक्कम मोजावी लागेल, असे एसटी विभागाने स्पष्ट केले आहे.
