शहरातील अनेक रस्ते उखडले आहेत. त्याच्या डागडुजीचे काम नगरपालिकेने हाती घेतले आहे, पण हे खड्डे खडीने न भरता नदीपात्रातील मातीमिश्रित गाळाने भरले जात आहेत. त्यावर बारीक खडी टाकून डांबरने बुजविले जात आहेत. खडीऐवजी मातीमिश्रित गाळ खड्डे बुजविण्यासाठी वापरणे हे कोणत्या शास्त्रात बसते हे नगरपालिकेने एकदा सांगावे, असा सवाल सामाजिक कार्यकर्ते संजीव अणेराव यानी केला आहे. चिपळूण महापूर-वाशिष्ठी नदीतील गाळाचे लाभार्थी आणि चिपळूण शहरातील खड्डयांचे वास्तव यावर प्रतिक्रिया व्यक्त करताना अणेराव म्हणाले, चिपळूण शहरात आलेल्या महापुरामुळे हजारो नागरिकांचे नुकसान झाले.
मात्र गाळ उपसा झाल्यानंतर या गाळाचे अनेक जण लाभार्थी झाले. या लाभार्थीपैकी एक चिपळूण पालिकाही आहे. शहरातील स्वामी मठ ते रामेश्वर मंदिर रस्ता, क्वालिटी बेकरी ते रामेश्वर मंदिर रस्ता, प्रभात रोड आणि मुरादपूर रोड ही याची प्रातिनिधिक उदाहरणे आहेत. या रस्त्यांवर मतिमिश्रित गोल दगडांच्या गाळाचे अनेक ठिकाणी ढीग मारलेले आहेत. यातील स्वामी मठ ते रामेश्वर मंदिर या रस्त्याला गेल्या पावसाळ्यापासून प्रचंड खड्डे पडले आहेत.
अखंड उन्हाळा गेला पण नगरपालिकेने या रस्त्यावरील खड्डे भरले नाहीत आणि आता नदीतील गाळ टाकून खड्डे भरले जात आहेत. मोठा पाऊस पडला की ही माती वरती येणार हे कोणीही सांगू शकेल. सीईओ शिंगटे यानी यामध्ये हस्तक्षेप करावा आणि हा जनतेच्या पैशांचा अपव्यय तातडीने थांबवावा आणि टाकलेला गाळ काढून पूर्ण खडी आणि डांबराने हे खड्डे भरावेत, अशी मागणीही त्यानी केली आहे.
