दीड दिवसाच्या बाप्पांना निरोप देताना खेडमधील अलसुरे गावी एक तरूण पाण्यात बुडाला असून गुरूवारी रात्री उशीरापर्यंत त्याचा थांगपत्ता लागला नव्हता. एनडीआरएफच्या पथकासह गावकऱ्यांनी शोधकार्य सुरू केले. मात्र तो सापडला नाही. स्थानिक रेस्क्यू टीमसह पोलीस आणि प्रशासकीय अधिकारी देखील घटनास्थळी रात्री उशीरापर्यंत शोध घेत होते. अंधारामुळे शेवटी शोधकार्य थांबले. पोलीसांनी पत्रकारांना दिलेल्या माहितीनुसार, मंगेश पाटील असे बेपत्ता झालेल्या युवकाचे नाव असून तो जगबुडी नदीमध्ये सायंकाळी ६ वाजण्याच्या सुमारास बुडाला. तत्काळ त्याचा शोध सुरू झाला. या घटनेनंतर परिसरात एकच खळबळ उडाली आहे. एनडीआरएफचे पथक सुद्धा दाखल झाले. अधिक वृत्त असे की, मंगेश पाटील आणि त्याच्यासोबत आणखी एक युवक नदीपत्रात उतरले होते. पाण्याचा प्रवाह जास्त असल्याने दोघेही बुडू लागले. त्यापैकी दुसऱ्या तरुणाने कसाबसा पोहत किनारा गाठला. मात्र मंगेश पाटील हा युवक नदीच्या पाण्यात बुडाला.
या घटनेची माहिती मिळताच खेड नगरपालिकेचे अग्निशामक दल, खेड शहरातील विसर्जन कट्टा पथक तसेच खेड रेस्क्यू टीम तातडीने घटनास्थळी दाखल झाली. दरम्यान, शिवसेना उपनेते व माजी आमदार संजय कदम यांनी स्वतः घटनास्थळी धाव घेऊन पाहणी केली. खेड तालुका प्रशासनानेही तातडीने घटनास्थळी धाव घेतली. यात खेडचे उपविभागीय पोलीस अधिकारी, पोलीस निरीक्षक आणि त्यांचे कर्मचारी मोठ्या संख्येने उपस्थित होते. तहसीलदार आणि प्रांताधिकारी यांनीही घटनास्थळी हजेरी लावून मदतकार्यात समन्वय साधला. विशेष म्हणजे, मंगेश पाटील हे भोस्ते पाटीलवाडीचे रहिवासी असून त्यांच्या घरी यंदाच पहिल्यांदाच गणपती बाप्पाचे आगमन झाले होते. हा गणपती नवसाचा असल्याची चर्चा घटनास्थळी सुरू होती. गुरूवारी सायंकाळी उशीरापर्यंत मंगेश पाटील यांचा शोध घेण्यासाठी युद्धपातळीवर प्रयत्न सुरू होते. परिसरातील नागरिक मोठ्या संख्येने घटनास्थळी जमले होते.
