गेल्या अनेक महिन्यांपासून हातपाटी वाळू व्यावसायिकांचे प्रश्‍न रखडलेले होते. यामध्ये रॉयल्टीचा मुद्दा हा प्रमुख होता. यासंदर्भात कॉंग्रेसचे तालुकाध्यक्ष प्रशांत यादव यांनी प्रदेशाध्यक्ष नाना पटोले यांच्याशी सविस्तर चर्चा केली होती. वाळू व्यावसायिकांच्या अडचणी श्री. पटोले यांच्यासमोर त्यांनी मांडल्या होत्या. तसेच वाळू व्यावसायिकांच्या प्रश्‍नावर प्रशांत यादव यांनी जिल्हाध्यक्ष अविनाश लाड यांच्या मार्गदर्शना खाली महसूलमंत्री बाळासाहेब थोरात यांना निवेदन देवून प्रत्यक्ष चर्चाही केली होती. त्यावेळी महसूलमंत्री बाळासाहेब थोरात यांच्याशी चर्चा करून या अडचणी सोडवण्याचे आश्‍वासन नाना पटोले यांनी दिले होते.
दरम्यान, मुंबई येथे मंत्रालयात महसूलमंत्री थोरात आणि महसूलचे प्रधान सचिव मनुकुमार श्रीवास्तव यांच्या प्रमुख उपस्थितीत बैठक पार पडली. या बैठकीमध्ये हातपाटी वाळू व्यावसायिकांसाठीची पर्यावरण दाखल्या बाबतची अट रद्द करण्याचा आणि त्यांना रॉयल्टीमध्ये सवलत देण्याचा निर्णय घेण्यात आला. तसेच छोट्या हातपाटी पद्धतीने वाळू व्यवसाय करणार्‍या गरीब व्यावसायिकांना वाळूची रॉयल्टी माफ करण्याचा महत्त्वपूर्ण निर्णय या बैठकीत घेण्यात आला आहे.
हातपाटी वाळू व्यावसायिकांबाबत ऐतिहासिक निर्णय घेवून या व्यावसायिकांबाबत ऐतिहासिक दिलासा दिल्याबद्दल चिपळुणातील हातपाटी वाळू व्यावसायिकांनी कॉंग्रेसचे मंत्री, नेते आणि वरिष्ठ पदाधिकारी यांच्यासह स्थानिक पदाधिकारी यांचे आभार मानले आहेत. कोकण खाडी पारंपारिक हातपाटी वाळू व्यावसायिक संघटनेचे अध्यक्ष अन्वर जबले यांनी काँग्रेसचे मंत्री, नेते आणि पदाधिकारी यांच्यामुळे वाळू व्यावसायिकांना दिलासा मिळाला आहे, अशी प्रतिक्रिया व्यक्त केली.
याबद्दल त्यांनी चिपळुणातील वाळू व्यावसायिकांच्या वतीने काँग्रेसचे ज्येष्ठ नेते व महसूलमंत्री थोरात, काँग्रेसचे प्रदेशाध्यक्ष नाना पटोले, राजापूरच्या माजी आ.हुस्नबानू खलिफे, रत्नागिरी जिल्हा काँग्रेसचे जिल्हाध्यक्ष अविनाश लाड आणि चिपळूण तालुका काँग्रेसचे अध्यक्ष यादव यांचे आभार मानले.
