कोकण रेल्वेच्या प्रवासी सल्लागार समिती सदस्य सचिन वहाळकर यांनी केलेल्या पाठपुराव्यामुळे १२ फेब्रुवारीला अयोध्येकडे जाणारी पहिली विशेष गाडी धावणार आहे. देशातील ६६ रेल्वे स्थानकांवरून आयआरसीटीसीमार्फत अयोध्या दर्शनासाठी ‘आस्था ट्रेन’ चालविल्या जाणार आहेत. गोव्यातील वास्को जंक्शन येथून १२ फेब्रुवारीला रात्री ९ वाजून १० मिनिटांनी अयोध्येला जाणारी विशेष गाडी सुटणार आहे.
मडगाव, थिवीम, कुडाळ, कणकवली, वैभववाडी, रत्नागिरी, संगमेश्वर, चिपळूण, खेड, मराणगाव, रोहा, पनवेल, वसईमार्गे विशेष गाडी उत्तरप्रदेशातील अयोध्येकडे रवाना होणार आहे. रत्नागिरी जिल्ह्यातून असंख्य प्रवासी अयोध्येला जाण्यासाठी प्रतिक्षेत असलेली विशेष गाडीचे वेळापत्रक कोकण रेल्वेमार्फत जाहीर करण्यात आले आहे. अयोध्येत दर्शन घेतल्यानंतर प्रवाशांना पुन्हा मूळगावी पोहोचविण्यासाठी आयआरसीटीसीने पुढाकार घेतला आहे.
