अति घाई आणि संकटात नेई, असे म्हणतात. या म्हणीचे तंतोतंत प्रत्यंतर शनिवारी कोकण रेल्वेच्या रत्नागिरी स्थानकावर अनेकांना आले. चालत्या ट्रेनमधून बेजबाबदारपणे उतरणारा तरुण पडला आणि ट्रेनखाली जात होता. पण प्लॅटफॉर्मवर सेवेत असलेल्या २ आरपीएफचे जवान आणि एका विक्रेत्याच्या सतर्कतेने त्याचे प्राण वाचले. या घटनेचे सीसीटीव्ही फुटेज समोर आले आहे. शनिवारी सकाळी एल.टी. टी. (लोकमान्य टिळक टर्मिनस) सावंतवाडी ही गाडी सकाळी ६ वाजून ४१ मिनिटांनी रत्नागिरीच्या प्लॅटफॉर्म क्रमांक १ वर दाखल झाली. ट्रेन प्लॅटफॉर्मवर थांबण्यापूर्वीच यातील एका तरुणाने ट्रेनमधून उतरण्याचा प्रयत्न केला. या चुकीच्या प्रयत्नांत हा तरुण चालत्या ट्रेनच्या खाली येणार होता. पणं तो पडताच प्लॅटफॉर्मवर कार्यरत असलेल्या कोकण रेल्वेचे २ आरपीएफ जवान आणि एका विक्रेत्याने सतर्कता दाखवत त्याला वेगाने बाजूला ओढले. त्यामुळे त्याचे प्राण वाचले.
कोकण रेल्वेचे आरपीएफ जवान रणजीत सिंह आणि महेंद्र पाल तसेच विक्रेता वीर सिंग यांनी त्याला वेळीच ओढत ट्रेनखाली जाण्यापासून वाचवले. त्याच्याबरोबर प्रवास करीत असलेल्या प्रवाशांकडून मिळालेल्या माहितीनुसार हा तरुण गोळप, रत्नागिरी येथील असल्याची माहिती पुढे आली आहे. या जखमी तरुणावर कोकण रेल्वेच्या पथकाने तात्काळ प्रथम उपचार केले आणि पुढील उपचारासाठी त्याला जिल्हा शासकीय रुग्णालयात हलवण्यात आले. या घटनेची दखल कोकण रेल्वेचे अध्यक्ष तथा व्यवस्थापकीय संचालक संतोष कुमार झा यांनी घेतली आणि या तिघांचेही विशेष कौतुक केले आहे. संतोष कुमार झा यांनी या तिघांना ही प्रत्येकी ५ हजार रुपयांचे अवॉर्ड जाहीर करून ते तात्काळ त्यांना प्रदान करण्यात आले आहे.
