वापरात नसलेल्या मच्छीमार नौकांचे नाव, नंबर वापरून बनावट नंबरद्वारे बेकायदेशीर मासेमारी करण्याचा गंभीर प्रकार पुढे आला आहे. ड्रोन कॅमेऱ्याने टिपलेल्या छायाचित्रावरून हा घोळ उघड झाला आहे. ड्रोन कॅमेऱ्यांने टिपलेल्या छायाचित्रानुसार, मत्स्य व्यवसाय विभागाने सुनावणीसाठी येण्याची नोटीस मालकांना आल्यानंतर हा प्रकार उजेडात आला. याप्रकरणी संबंधित नौकामालकांनी पोलिस अधीक्षकांसह साहाय्यक मत्स्य व्यवसाय विभागाकडे तक्रार अर्ज दिला असून, चौकशी करण्याची मागणी केली आहे. रत्नागिरीच्या समुद्रात अल् फातिमा नावाची नौका प्रतिबंधित क्षेत्रात मासेमारी करत असल्याचे ड्रोन कॅमेऱ्याच्या टिपलेल्या छायाचित्रातून स्पष्ट झाले. त्यानंतर मत्स्य व्यवसाय विभागाकडून कार्यवाहीसाठी नौकामालकांना नोटीस दिली. नौकामालक मुश्ताक मोहम्मद वस्ता यांना ही नोटीस मिळाली.
नोटीस मिळाल्यानंतर नौकामालक सुनावणीसाठी साहाय्यक मत्स्य व्यवसाय आयुक्त तथा अधिनिर्णय अधिकाऱ्यांसमोर गेले आणि आपल्या नौकेबाबत माहिती दिली. त्यांची अल् फातिमा नावाची नौका वर्षभरापूर्वीच समुद्रात लाटेच्या माऱ्याने समुद्रात बुडून पूर्णतः नष्ट झाली आहे. ही माहिती त्यांनी अभिनिर्णय अधिकारी तथा साहाय्यक मत्स्य व्यवसाय आयुक्तांसमोर मांडली. त्याचबरोबर आपल्या नौकेचे नाव, नंबर वापरून कोणीतरी बेकायदेशीर नौकेने मासेमारी करत असल्याची लेखी तक्रारही केली. सागरी सुरक्षेच्यादृष्टीने हीच तक्रार पोलिस अधीक्षकांकडेसुद्धा करण्यात आली आहे. पोलिसांनी तातडीने तपासणी करण्याची विनंतीही तक्रारीद्वारे करण्यात आली आहे. दुसरी जाविदी मासेमारी नौका प्रतिबंधित समुद्रक्षेत्रात एलईडी प्रकाशात मासेमारी करत असल्याने नौकामालक असिफ जावेद वस्ता यांना सुनावणीसाठी बोलावण्यात आले.
ड्रोन कॅमेऱ्याने टिपलेले या नौकेचे छायाचित्र दाखवण्यात आले. त्यावेळी नौकामालकाला ती नौका त्यांची नसल्याचे लक्षात आले. याबाबत नौकामालक असिफ वस्ता यांनीही पोलिस अधीक्षकांसह साहाय्यक मत्स्य व्यवसाय आयुक्तांकडे तक्रार करून चौकशी करण्याची मागणी केली आहे. आपल्या बोटीचा क्रमांक आणि नाव दुसऱ्याच बोटीवर लावून बेकायदेशीर मासेमारी केली जात आहे. याबाबत पोलिस आणि मत्स्य व्यवसाय विभागाने चौकशी करून कठोर कारवाई करण्याची मागणी केली आहे. दरम्यान, आसिफ वस्ता यांच्या नौकेचीही मत्स्य व्यवसाय विभागाच्या अधिकाऱ्यांनी नुकतीच पाहणी केली आहे.
मत्स्यविभागही अचंबित – मत्स्यविभागाच्या अधिकाऱ्यांशी याबाबत चर्चा केली असता ते म्हणाले, आमच्यासाठीही हा सर्व प्रकार अचंबित करणारा आहे. संबंधित मालकाने पोलिस अधीक्षक आणि आमच्याकडे तक्रार केली आहे. त्यामुळे बनावट नंबर, नाव वापरल्याबद्दल चौकशी करून संबंधितांवर कारवाई केली जाईल
