दिवसांपासून दोन गेल्या मुसळधार कोसळणाऱ्या पावसामुळे मुंबई गोवा महामार्गावरील परशुराम घाटात शनिवारी सकाळी ११:३० वाजण्याच्या दरम्यान मातीचा ढिगारा कोसळून रस्त्यावर आल्याने या मार्गावरची वाहतूक काही काळासाठी ठप्प झाली होती. काही दिवसांपासून दडी मारून बसलेला पाऊस दहीहंडी पासून सक्रिय झाला आहे. मुसळधार कोसळत असलेल्या पावसामुळे परशुराम घाटातील कटिंग करण्यात आलेल्या डोंगरातून पाणी येत असल्याने मातीचा भाग ठिसूळ बनून मातीचा ढिगारा रस्त्यावर आला.
यामुळे मुंबई गोवा महामार्गावरील चिपळूण आणि खेडकडील वाहतूक काही काळासाठी ठप्प झाली होती. दोन्ही बाजूला वाहनांच्या रांगा लागल्या होत्या. घटनास्थळावर पोलिस आणि महामार्गचे अधिकारी दाखल झाल्यानंतर सिंगल लेनवरून वाहतूक सुरळीत करण्यात आली. दिवसभर पावसाची रिपरिप सुरूच असल्याने परशुराम घाटातील दरडी कोसळण्याचे सत्र सुरूच राहण्याची चिन्हे दिसू लागली आहेत.
