दापोली येथील सीमाशुल्क (कस्टम्स) विभागाने दापोली बसस्थानकामागे एका कारमधून कोट्यावधी रुपये किंमत असलेली सुमारे ४ किलो ८३३ ग्रॅम वजनाची व्हेल माशाची उलटी जप्त केली असून या प्रकरणी ४ जणांना अटक केली असून त्यामध्ये एका पोलीस कर्मचाऱ्याचाही समावेश असल्याने खळबळ उडाली आहे. शुक्रवारी झालेल्या या कारवाईबाबत कस्टम्स विभागाच्या अधिकाऱ्यांनी पत्रकारांना दिलेल्या माहितीनुसार, १७ ऑक्टोबर रोजी व्हेल माशाच्या उलटीची विक्री करण्यासाठी काही जण आले असल्याची माहिती कस्टम्स विभागाच्या अधिकाऱ्यांना मिळाली होती. त्याआधारे त्यांनी संशयित गाडीचा पाठलाग केला. ही कार दापोली बसस्थानकामागे थांबवली. या वाहनाची झडती घेतली असता त्यांना त्या वाहनात व्हेल माशाची उलटी आढळून आली. या कारमध्ये ४ संशयित आढळून आले. त्यांना मुद्देमालासह ताब्यात घेण्यात आले. चौकशीसाठी दापोली येथील कस्टम्स कार्यालयात आणण्यात आले आणि त्यांची चौकशी करण्यात आली. पोलीस स्थानकात अधिकृतपणे फिर्याद नोंदविण्यात आली आहे.
याप्रकरणी संशयित आरोपी म्हणून युवराज मोरे (मुंबई), संजय धोपट (दाभोळ), निलेश साळवी (रत्नागिरी), सिराज शेख (मुंबई) यांचेविरोधात वन्यजीव संरक्षण कायदा १९७२ नुसार गुन्हा दाखल करून त्यांना अटक करण्यात आली असल्याची माहिती दापोली पोलीसांनी पत्रकारांना दिली. संशयित आरोपींपैकी संजय धोपट हे दाभोळ सागरी पोलीस ठाण्यात कार्यरत आहेत, त्यामुळे पोलीस कर्मचारीच असा गुन्हा करत असतील तर सामान्यांनी कोणाकडे पाहावे अशी चर्चा सुरु आहे. या कारवाईत सीमाशुल्क विभागाचे अधीक्षक अतुल पोतदार, निरीक्षक प्रतीक अहलावत, रमणिक सिंग, मुख्य हवालदार सुहास विलणकर, करण मेहता, प्रशांत खोब्रागडे, गौरव मौर्य, हेमंत वासनिक सहभागी झाले होते. संशयिताना शनिवारी न्यायालयात हजर केले असता त्यांना न्यायालयीन कोठडीत ठेवण्याचे आदेश न्यायालयाने दिले आहेत.
