रत्नागिरी कस्टम्स विभागाची पडवे जेट्टीसमोर धडक कारवाई; मासेमारी बोटीच्या छुप्या कप्प्यातून चालली होती कोट्यवधींची इंधन तस्करी.

रत्नागिरी: कोकणच्या विस्तीर्ण सागरी किनाऱ्याचा फायदा घेऊन चालणाऱ्या काळ्या धंद्यांविरुद्ध रत्नागिरी कस्टम्स विभागाने एक मोठी आणि अत्यंत धडक कारवाई केली आहे. अंमली पदार्थ आणि इंधनाच्या बेकायदेशीर तस्करीला आळा घालण्यासाठी प्रशासनाने आपली मोहीम तीव्र केली असतानाच, रत्नागिरीच्या जयगड खाडीत मध्यरात्रीच्या सुमारास एक थरारक प्रसंग घडला. कस्टम्सच्या पथकाने फिल्मी स्टाईलने सापळा रचून तब्बल ५ हजार ५०० लीटर बेकायदेशीर डिझेलची तस्करी करणारी एक संशयास्पद बोट जप्त केली आहे.

पुणे कस्टम्स आयुक्तालयाच्या अंतर्गत येणाऱ्या रत्नागिरी कस्टम्स डिव्हिजनने ही कारवाई केली असून, या कारवाईमुळे कोकणच्या सागरी मार्गावरील डिझेल तस्करीचे एक मोठे आंतरराज्यीय किंवा आंतरराष्ट्रीय रॅकेट उघडकीस येण्याची शक्यता वर्तवली जात आहे.

मध्यरात्री रचला सापळा; पडवे जेट्टीसमोर बोटीला घातला वेढा!

जयगड खाडीच्या शांत पात्रात मध्यरात्रीच्या अंधाराचा फायदा घेऊन एका मच्छीमारी बोटीतून बेकायदेशीर डिझेलची मोठी खेप किनाऱ्यावर उतरवली जाणार आहे, अशी खात्रीशीर आणि गोपनीय माहिती कस्टम्सच्या वरिष्ठ अधिकाऱ्यांना मिळाली होती. माहिती मिळताच अधिकाऱ्यांनी कोणतीही दिरंगाई न करता तातडीने व्यूहरचना आखली.

तस्करांना पळून जाण्यासाठी कोणताही मार्ग उरू नये म्हणून खाडीच्या उत्तर आणि दक्षिण अशा दोन्ही बाजूंनी कडेकोट पहारा ठेवण्यात आला. तर दुसऱ्या एका विशेष पथकाने स्वतः एका बोटीतून खाडीच्या पात्रात गस्त सुरू केली. मंगळवारी मध्यरात्री ठीक २:३० वाजताच्या सुमारास, पडवे जेट्टीसमोरील खाडीच्या पात्रात एक संशयास्पद बोट संथ गतीने येताना दिसली. अचूक वेळ साधत कस्टम्सच्या पथकाने अत्यंत शिताफीने आणि धाडसाने या बोटीला चहूबाजूंनी वेढा घातला आणि ती जागीच रोखली.

माशांऐवजी आढळली डिझेलची पिंपे; ५ संशयित गजाआड!

कस्टम्सच्या अधिकाऱ्यांनी जेव्हा या संशयास्पद बोटीवर चढून तपासणी सुरू केली, तेव्हा तिथले दृश्य पाहून अधिकारीही चक्रावले. बाहेरून हुबेहूब सर्वसामान्य मच्छीमारी बोट वाटणाऱ्या या नौकेत मासेमारीचे कोणतेही जाळे किंवा साहित्य नव्हते. त्याऐवजी बोटीच्या छुप्या कप्प्यांमध्ये आणि तळाशी मोठ्या पिंपांमध्ये (Barrels) तब्बल ५,५०० लीटर बेकायदेशीर डिझेल लपवून ठेवले होते. कर चुकवून बेकायदेशीरपणे हा साठा आणला गेला होता. याप्रकरणी बोटीवरील ५ कर्मचाऱ्यांना कस्टम्सने जागीच ताब्यात घेतले असून त्यांची कसून चौकशी सुरू आहे.

खोल समुद्रातील ‘बार्ज’ कडून घेतले होते डिझेल!

प्राथमिक चौकशीत समोर आलेल्या माहितीनुसार, हे डिझेल थेट आंतरराष्ट्रीय सागरी मर्यादेजवळ खोल समुद्रात उभ्या असलेल्या एका मोठ्या ‘बार्ज’ (Barge) किंवा ‘टगबोट’ कडून घेण्यात आले होते. तिथून ते छोट्या मच्छीमारी बोटीत भरून रत्नागिरीच्या किनाऱ्यावर बेकायदेशीरपणे उतरवून स्थानिक बाजारपेठेत विकण्याचा तस्करांचा डाव होता. कस्टम्सने ५,५०० लीटर डिझेल आणि तस्करीसाठी वापरलेली बोट कस्टम कायद्यांतर्गत जप्त केली असून, आंतरराष्ट्रीय बाजारपेठेनुसार या जप्त केलेल्या मालाची एकूण किंमत ठरवण्याचे काम युद्धपातळीवर सुरू आहे.

या धाडसी कारवाईतील ‘कस्टम्स’चे जाँबाज हिरो:

जीवाची बाजी लावून मध्यरात्रीच्या अंधारात ही यशस्वी कामगिरी करणाऱ्या पथकाचे नेतृत्व कस्टम्सचे अधीक्षक संजय यादव यांनी केले. या थरारक मोहिमेत त्यांच्यासोबत खालील अधिकाऱ्यांनी मोलाची भूमिका बजावली:

• अधीक्षक लक्ष्मीकांत शंकर भाटकर

• अधीक्षक संदीप कौशिक

• अधीक्षक विनोद

• निरीक्षक रमेश गुप्ता

• निरीक्षक राजेश गोपाळ लाडे

• सीमन मुफिद नाखवा

कस्टम्स विभागाच्या या धडक कारवाईमुळे किनारपट्टीवरील तस्करांचे धाबे दणाणले असून सागरी सुरक्षेच्या दृष्टीने हे एक मोठे यश मानले जात आहे.