लांजा: रत्नागिरी जिल्ह्यातील लांजा तालुक्यातून एक अत्यंत धक्कादायक आणि थरकाप उडवणारी घटना समोर आली आहे. तालुक्यामधील बेनी बुद्रुक गावातील कुसुममळेवाडी परिसरात बुधवारी रात्री एका हिंस्त्र बिबट्याने थेट मानवी वस्तीत प्रवेश करत एका घरात घुसून जीवघेणा हल्ला केला. या अचानक झालेल्या हल्ल्यामुळे संपूर्ण परिसरात एकच खळबळ उडाला असून ग्रामस्थांमध्ये प्रचंड भीतीचे वातावरण निर्माण झाले आहे.
मिळालेल्या माहितीनुसार, बुधवारी रात्री नेहमीप्रमाणे कुसुममळेवाडीतील कुटुंब घरात होते. रात्रीच्या शांततेत अचानक एका बिबट्याने घरात प्रवेश केला. घरातील सदस्यांना काही समजण्याच्या आतच, बिबट्याने घरात बसलेल्या एका ५२ वर्षीय व्यक्तीवर थेट झडप घातली. बिबट्याचा हा अचानक झालेला हल्ला इतका वेगवान आणि भयंकर होता की घरामध्ये एकच गोंधळ आणि किंचाळ्या सुरू झाल्या.
आपला जीव वाचवण्यासाठी त्या व्यक्तीने मदतीसाठी आरडाओरडा सुरू केला. त्यांचा आवाज ऐकून शेजारी राहणारा एक १९ वर्षीय युवक अत्यंत धाडसाने मदतीसाठी धावून आला. मात्र, मानवी प्रतिकारामुळे बिबट्या अधिकच आक्रमक आणि हिंस्त्र झाला. त्याने मदतीसाठी आलेल्या त्या युवकावरही अत्यंत वेगाने हल्ला चढवला. या दोघांनीही बिबट्याशी निकराची झुंज दिली, ज्यामुळे बिबट्याने तिथून पळ काढला. मात्र, या थरारक झटापटीत ५२ वर्षीय गृहस्थ आणि तो तरुण दोघेही गंभीररित्या जखमी झाले आहेत. त्यांच्यावर सध्या रुग्णालयात उपचार सुरू आहेत.
परिसरात घबराट; पिंजरा लावण्याची मागणी या धक्कादायक घटनेमुळे बेनी बुद्रुक आणि आसपासच्या ग्रामीण भागात प्रचंड दहशतीचे सावट पसरले आहे. वन्यजीवांचा मानवी वस्तीतील वावर दिवसेंदिवस वाढत चालल्याने ग्रामस्थ भयभीत झाले आहेत. रात्रीच्या वेळी घरातही सुरक्षितता उरली नसल्याची भावना आता स्थानिक व्यक्त करत आहेत. या घटनेची माहिती मिळताच वन विभागाचे अधिकारी सतर्क झाले असून, संबंधित हिंस्त्र बिबट्याला जेरबंद करण्यासाठी वन विभागाने तातडीने परिसरात पिंजरा लावावा, अशी आग्रही मागणी ग्रामस्थांकडून केली जात आहे.
