मुंबई: राजकीय वर्तुळात सध्या भाजप आणि महाराष्ट्र नवनिर्माण सेना (मनसे) यांच्यातील संघर्ष चांगलाच पेटला आहे. पुण्यातील एका महाविद्यालयात मनसे नेते अमित ठाकरे यांनी पंतप्रधान नरेंद्र मोदी यांचा फोटो हटवण्यास सांगितल्याच्या कथित घटनेचे तीव्र पडसाद आता थेट मुंबईत उमटताना दिसत आहेत. या घटनेचा निषेध करण्यासाठी भाजप युवा मोर्चाने (भाजयुमो) थेट मनसे अध्यक्ष राज ठाकरे यांच्या दादर येथील ‘शिवतीर्थ’ निवासस्थानावर धडक देण्याचा इशारा दिला होता. मात्र, मनसैनिकांच्या आक्रमक पवित्र्यामुळे आणि पोलिसांच्या सतर्कतेमुळे भाजयुमोच्या कार्यकर्त्यांना शिवाजी पार्कची वेसही ओलांडता आली नाही.
‘शिवतीर्थ’बाहेर मनसैनिकांचा गराडा; नेत्यांनी लावली तगडी फिल्डिंग
भाजयुमो राज ठाकरेंच्या निवासस्थानाबाहेर आंदोलन करणार असल्याची कुणकुण लागताच मुंबई, ठाणे आणि नवी मुंबईतून शेकडो मनसैनिक तातडीने शिवाजी पार्क परिसरात दाखल झाले. संदीप देशपांडे, अविनाश जाधव आणि गजानन काळे यांसारखे मनसेचे प्रमुख नेते स्वतः कार्यकर्त्यांसह राज ठाकरेंच्या घराबाहेर तळ ठोकून उभे राहिले.
मनसे नेत्यांनी थेट आव्हान देत म्हटले, “आम्ही भाजप कार्यकर्त्यांचे स्वागत करायला सज्ज आहोत. त्यांनी इथे येऊनच दाखवावे, त्यांना मनसे स्टाईलने चोख उत्तर दिले जाईल.” बराच वेळ वाट पाहूनही भाजपचे कार्यकर्ते न आल्याने संदीप देशपांडे यांनी, “त्यांनी आम्हाला फक्त जागा सांगावी, आम्ही स्वतः तिकडे येतो,” असा थेट इशाराही दिला.
माटुंगा आणि माहीममध्ये पोलिसांचा कडेकोट बंदोबस्त; कृष्णराज महाडिक ताब्यात
भाजयुमोचे नेते कृष्णराज महाडिक हे कार्यकर्त्यांसह माहीम आणि माटुंगा मार्गे ‘शिवतीर्थ’च्या दिशेने निघण्याच्या तयारीत होते. मात्र, दादर परिसरात दोन्ही पक्षांचे कार्यकर्ते समोरासमोर येऊन मोठा राडा होण्याची दाट शक्यता निर्माण झाली होती. परिस्थितीचे गांभीर्य ओळखून मुंबई पोलिसांनी दादर, माहीम आणि माटुंगा परिसरात प्रचंड फौजफाटा तैनात केला.
कृष्णराज महाडिक यांनी पोलिसांची नजर चुकवून शिवतीर्थाच्या दिशेने आगेकूच करण्याचा प्रयत्न केला, परंतु पोलिसांनी त्यांना माहीम परिसरातच रोखून ताब्यात घेतले. या वेळी प्रसारमाध्यमांशी बोलताना महाडिक म्हणाले, “अमित ठाकरे यांनी पुण्यात जो तमाशा केला, त्याचा विरोध करण्यासाठी आम्ही आलो होतो. शासकीय प्रोटोकॉलनुसार पंतप्रधान आणि राष्ट्रपतींचा फोटो लावणे बंधनकारक असते.”
गजानन काळे माटुंग्यात दाखल, कार्यकर्त्यांमध्ये बाचाबाची
भाजयुमोचे कार्यकर्ते माटुंगा आणि माहीम परिसरात थांबल्याची माहिती मिळताच मनसैनिकांनी वेगवेगळ्या तुकड्या करून त्या दिशेने मोर्चा वळवला. मनसे नेते गजानन काळे यांच्यासह काही कार्यकर्ते थेट माटुंग्यात भाजप कार्यकर्त्यांच्या जवळ पोहोचले. यामुळे काही काळ दोन्ही बाजूंच्या कार्यकर्त्यांमध्ये जोरदार घोषणाबाजी आणि तणावाचे वातावरण निर्माण झाले. मात्र, कोणताही अनुचित प्रकार घडण्यापूर्वीच पोलिसांनी तत्परता दाखवत मनसेच्या कार्यकर्त्यांनाही ताब्यात घेतले.
सध्याची परिस्थिती काय?
सध्या शिवाजी पार्क आणि राज ठाकरे यांच्या ‘शिवतीर्थ’ निवासस्थानाबाहेर मोठा पोलीस बंदोबस्त तैनात करण्यात आला असून मनसेचे कार्यकर्तेही मोठ्या संख्येने उपस्थित आहेत. मनसैनिकांचा आक्रमक पवित्रा पाहता भाजप युवा मोर्चाला ‘शिवतीर्थ’पर्यंत पोहोचणे शक्य झाले नाही. तुर्तास पोलिसांनी परिस्थिती नियंत्रणात आणली असली, तरी या घटनेमुळे मुंबईतील राजकीय वातावरण चांगलेच तापले आहे.
