खेड (रत्नागिरी): खेड तालुक्यातील शिंगरी बौद्धवाडी येथून एक अत्यंत दुर्दैवी आणि सुन्न करणारी घटना समोर आली आहे. येथील अवघ्या ३५ वर्षांच्या तरुणाने आपल्या राहत्या घरात गळफास घेऊन जीवन संपवले आहे. महेश दगडू पवार असे या मृत तरुणाचे नाव असून, ऐन उमेदीच्या वयात त्याने उचललेल्या या टोकाच्या पावलामुळे शिंगरी परिसरासह संपूर्ण खेड तालुक्यात हळहळ व्यक्त होत आहे.
घरातील पत्र्याच्या चॅनेलला घेतला गळफास
मिळालेल्या माहितीनुसार, महेश दगडू पवार (वय ३५, रा. शिंगरी बौद्धवाडी, ता. खेड, जि. रत्नागिरी) हे घरात एकटे असताना ही घटना घडली असावी असा अंदाज आहे. त्यांनी राहत्या घरातील छताच्या पत्र्याला असलेल्या लोखंडी चॅनेलला नायलॉनच्या दोरीने गळफास घेतला. प्राथमिक अंदाजानुसार, ही घटना २१ सप्टेंबर रोजी सायंकाळी ५:०० वाजेपासून ते २२ सप्टेंबर रोजी सकाळी १०:०० वाजण्याच्या दरम्यान घडली असण्याची शक्यता वर्तवली जात आहे.
रुग्णालयात दाखल करण्यापूर्वीच प्राणज्योत मालवली
सकाळी ही घटना उघडकीस येताच परिसरातील ग्रामस्थ आणि कुटुंबीयांना मोठा धक्का बसला. स्थानिकांनी क्षणाचाही विलंब न लावता महेश यांना तातडीने खाली उतरवून उपचारासाठी कळंबणी येथील उपजिल्हा रुग्णालयात नेले. मात्र, तेथील वैद्यकीय अधिकाऱ्यांनी तपासणी करून रुग्णालयात दाखल करण्यापूर्वीच त्यांचा मृत्यू झाल्याचे घोषित केले. यामुळे कुटुंबीयांवर दुःखाचा डोंगर कोसळला आहे.
खेड पोलिसांत आकस्मिक मृत्यूची नोंद
या घटनेची माहिती मिळताच खेड पोलिसांनी तातडीने कारवाई करत पंचनामा केला. २२ सप्टेंबर रोजी दुपारी ३:३३ च्या सुमारास खेड पोलीस ठाण्यात भारतीय नागरिक सुरक्षा संहिता (BNSS) कलम १९४ अंतर्गत आकस्मिक मृत्यूची (Accidental Death) नोंद करण्यात आली आहे.
तरुणाने इतके टोकाचे पाऊल नेमके का उचलले, यामागे काही कौटुंबिक, मानसिक अथवा आर्थिक विवंचना होती का? याबाबतचे ठोस कारण अद्याप समोर आलेले नाही. या प्रकरणाचा पुढील सखोल तपास खेड पोलीस करत आहेत.
(टीप : जीवन अनमोल आहे. कोणत्याही समस्येवर आत्महत्या हा पर्याय नाही. मानसिक तणाव किंवा नैराश्य जाणवल्यास त्वरित समुपदेशक किंवा मानसिक आरोग्य हेल्पलाइनशी संपर्क साधावा.)
