ठाण्यातील मानपाडा परिसरात शिवसेना (उद्धव बाळासाहेब ठाकरे) पक्षाचे विभागप्रमुख प्रदीप पूर्णेकर यांच्या झालेल्या निर्घृण हत्येने संपूर्ण राजकीय वर्तुळात मोठी खळबळ उडवून दिली आहे. या धक्कादायक घटनेनंतर ठाण्यात राजकीय तणाव शिगेला पोहोचला असून, पोलिसांनी आता तपासाची चक्रे वेगाने फिरवत ३ महिला आणि २ पुरुषांसह पाच संशयितांना ताब्यात घेतले आहे.
कार्यालयात घुसून निर्घृण हत्या
मंगळवारी रात्री प्रदीप पूर्णेकर आपल्या कार्यालयात उपस्थित असताना सुमारे पाच हल्लेखोरांनी अचानक आत घुसून त्यांच्यावर गोळ्या झाडल्या आणि कोयत्याने सपासप वार केले. या भीषण हल्ल्यात पूर्णेकर यांचा जागीच मृत्यू झाला. घटनेनंतर पूर्णेकर कुटुंबीयांनी शिंदे गटाच्या नेत्या मिनाक्षी शिंदे आणि त्यांचे पती राजेंद्र शिंदे यांच्यावर थेट आरोप केल्याने प्रकरणाला गंभीर राजकीय वळण लागले आहे.
पोलिसांची ९ पथके तपासात; ‘पप्या शिंदे’ कनेक्शन उघड
हत्येचे गांभीर्य ओळखून ठाणे पोलिसांच्या गुन्हे खंडणी विरोधी पथकासह इतर विशेष पथके मिळून तब्बल ९ तपास पथके तात्काळ रवाना करण्यात आली. मुंबई, ठाणे आणि लगतच्या परिसरामध्ये मारेकऱ्यांचा कसून शोध सुरू आहे.
तपासादरम्यान पोलिसांनी ताब्यात घेतलेल्या पाचही जणांचा गुन्ह्यापूर्वी मुख्य संशयित आरोपी पप्या शिंदे याच्याशी सतत संपर्क असल्याचे समोर आले आहे. या पाच जणांच्या सखोल चौकशीतून या हत्येमागील मुख्य सूत्रधार कोण आणि कट कसा रचला गेला, याचा मोठा उलगडा होण्याची दाट शक्यता वर्तवली जात आहे.
कापूरबावडी पोलीस ठाण्यात राऊत-आदित्य ठाकरेंचा ठिय्या
पूर्णेकर यांच्या हत्येनंतर ठाकरे गट कमालीचा आक्रमक झाला आहे. बुधवारी युवासेनाप्रमुख आदित्य ठाकरे, खासदार संजय राऊत आणि माजी खासदार राजन विचारे यांनी कापूरबावडी पोलीस ठाण्यात जाऊन थेट ठिय्या आंदोलन केले.
जोपर्यंत एफआयआर (FIR) मध्ये मिनाक्षी शिंदे आणि राजेंद्र शिंदे यांच्या नावांचा समावेश होत नाही, तोपर्यंत पोलीस ठाण्यातून हटणार नाही, असा ठाम पवित्रा नेत्यांनी घेतला. अखेर पोलीस ठाण्याबाहेर जमलेला मोठा जमाव पाहून आणि परिस्थिती चिघळू नये म्हणून पोलिसांनी पुरवणी जबाब नोंदवून संबंधित नावे तपासात समाविष्ट केली.
‘दडपशाही खपवून घेणार नाही’ – उद्धव ठाकरेंचा थेट इशारा
या घटनेवर शिवसेना पक्षप्रमुख उद्धव ठाकरे यांनीही संतप्त प्रतिक्रिया दिली आहे. विभागप्रमुखांच्या बैठकीत बोलताना ते म्हणाले, “जोपर्यंत मुख्य सूत्रधाराला अटक होत नाही, तोपर्यंत मागे हटायचे नाही. ठाण्यात सुरू असलेली ही दडपशाही आपण अजिबात सहन करणार नाही. आम्ही पूर्णेकर कुटुंबीयांच्या पाठीशी खंबीरपणे उभे आहोत आणि या अन्यायाला सडेतोड उत्तर देऊ.”
सध्या या हत्याकांडामुळे ठाण्यातील राजकीय वातावरण अतिशय संवेदनशील बनले असून पोलीस पुढील तपासावर बारीक लक्ष ठेवून आहेत.
