१० जूनला मान्सून तळ कोकणात दमदारपणे दाखल झाला आहे. मान्सूनच्या आगमनाबरोबरच रेल्वे प्रवाशांच्या नजरा लगेचच वळतात त्या कोकण रेल्वेच्या मान्सून वेळापत्रकाकडे. मान्सूनसाठी कोकण रेल्वेने पूर्ण तयारी केली असून रेल्वेकडून मान्सून वेळापत्रकही जाहीर करण्यात आले आहे. हे वेळापत्रक ११ जूनपासून लागू होणार आहे.
पावसाळ्यामध्ये कोकण रेल्वेचा वेग जरा मंदावतोच. कोकण रेल्वेचे पावसाळी वेळापत्रक लागू करण्यात आले असून या मार्गावरील गाड्या पावसाळी वेळापत्रकानुसार ११ जून ते ३१ ऑक्टोबर या कालावधीत धावणार आहेत. मुंबईच्या दिशेने जाणाऱ्या सर्व गाड्या या कोकण रेल्वे स्थानकावर एक ते दोन तास आधी येणार आहेत. पावसाळ्यात रेल्वे मार्गावरील दुर्घटना टाळण्यासाठी प्रतिवर्षाप्रमाणे रेल्वेने हा बदल केला आहे. त्यामुळे गाड्याच्या वेगावर मर्यादा येणार आहेत. त्यामुळे कोकण रेल्वे मार्गावर धावणाऱ्या गाड्याच्या प्रत्येक स्थानकावर येण्याच्या आणि जाण्याच्या वेळेत बदल केला आहे.
बदल करण्यात आलेल्या काही गाड्यांचे टाईम टेबल देण्यात आले आहे. यानुसार सावंतवाडीहून दिव्याकडे जाणारी दिवा पॅसेंजर गाडी सावंतवाडी येथून सकाळी ८.२५ वाजता सुटून कुडाळ येथे ८.४७ ,कणकवलीत ९.२१ आणि वैभववाडीला सकाळी १० वाजता पोहचणार आहे.
सावंतवाडी स्थानकातून सुटणारी तुतारी एक्सप्रेस उद्यापासून सायंकाळी ५.५५ वाजता सुटणार आहे. ही गाडी कुडाळ येथे ६.१६, कणकवलीत ६.४८, तर वैभववाडीत सायंकाळी ७.२२ वाजता पोहचणार आहे. मडगावहून मुंबईकडे जाणारी कोकण कन्या एक्सप्रेस सावंतवाडीला सायंकाळी ६.३० वाजता येईल. कुडाळ ६.५०, कणकवली ७.२० तर वैभववाडीला ७.५८ वाज ता येईल. मडगाव जनशताब्दी एक्सप्रेस सावंतवाडीला दुपारी १.१८ वाजता, कुडाळ १.४० वाजता तर कणकवलीत २.१० वाजता पोहचेल.
मंगलोर एक्सप्रेस कणकवली स्थानकावर मध्यरात्री १२.०८ वाजता सुटणार आहे. कुडाळ स्थानकावर थांबणारी मत्स्यगंधा एक्सप्रेस रात्री ८.५० वाजता सुटेल. कोचिवली ते इंदोर ही गाडी कुडाळ स्थानकावर पहाटे ४.४० वाजता सुटेल तर नियमित धावणारी नेत्रावती एक्सप्रेस पहाटे ५.३२ वाजता सुटणार आहे.
मांडवी एक्सप्रेस सावंतवाडी येथे सकाळी १०.४ वाजता, कुडाळमध्ये १०.२४ वाजता, कणकवलीत ११.०२ तर वैभववाडी स्थानकावर सकाळी ११.३२ वाजता येईल. कणकवली स्टेशनवर पहाटे येणारी मंगला एक्सप्रेस उद्यापासून पहाटे ५.०२ वाजता येईल तर ओखा एक्सप्रेसचा दुपारी १.०२ वाजता कणकवलीत दर शनिवारी आणि गुरूवारी थांबा असेल.
