दहशतवादी कारवाईप्रकरणी गोंदिया आणि रत्नागिरीतील पणदेरी येथून अटक करण्यात आलेल्या अन्य दोन दहशतवाद्यांकडून आणखी एक धक्कादायक माहिती पुढे आली आहे. कोंडव्यातील राहत्या घरी बॉम्ब बनवण्याची छोटी प्रयोगशाळाच असल्याचे उघड झाले आहे. तेथून बॉम्ब तयार करण्याचे साहित्य, पांढऱ्या रंगाची पावडर असा मुद्देमाल जप्त करण्यात आला आहे. या दहशतवाद्यांना यासाठी कोठून आर्थिस रसद पुरवली जाते, त्या एजन्सीचा आणि पुरवठादारांचा शोध आता एटीएस घेत आहेत. पुणे एटीएसने अटक केलेल्या दोघा दहशतवाद्यांना दीड वर्ष आर्थिक पुरवठा करणाऱ्या अभियंता सिमाब नसरूद्दीन काझी (रा. पणदेरी) याने दहशतवाद्यांसाठी थर्मामीटर, ड्रॉपर, पिपेट असे साहित्य खरेदी केल्याचे तपासात पुढे आले आहे.
आर्थिक पुरवठा करण्याएवढा याच्याकडे पैसा आला कोठून, याचा शोध एटीएस करत आहे. पुण्यातील कोथरूडमधून दुचाकीचोरीच्या प्रयत्नात असताना महम्मद इम्रान महम्मद युसुफ खान (वय २३) आणि महम्मद युसुफ महम्मद याकूब साकी (वय २४, दोघेही रा. मध्य प्रदेश) यांना अटक करण्यात आली होती. दोघांना आश्रय देणाऱ्या अब्दुल कादीर दस्तगीर पठाण याला देखील अटक करण्यात आली होती. त्यानंतर एका खासगी कंपनीत कामाला असलेल्या अभियंता सिमाब नसरूद्दीन काझी (वय २७) याला रत्नागिरीतून अटक करण्यात आली. या प्रकरणाचा तपास राज्य दहशतवादविरोधी पथकाकडून (एटीएस) करण्यात येत आहे. काझी याने खान आणि साकी यांना आर्थिक रसद पुरवल्याचे तपासात उघड झाले आहे.
खान आणि साकी कोंढव्यातील मिठानगर भागात राहत होते. सोमवारी एटीएसच्या पथकाने दहशतवाद्यांच्या घरातून बॉम्ब तयार करण्याचे साहित्य जप्त केले. दोघांनी बॉम्ब तयार करण्यासाठी वापरण्यात येणारे रासायनिक पदार्थ आणि विविध उपकरणे घरात लपवून ठेवली होती. अभियंता सिमाब काझी याने दहशतवाद्यांसाठी थर्मामीटर, ड्रॉपर, पिपेट असे साहित्य खरेदी केल्याचे तपासात स्पष्ट झाले असून, खरेदी केलेली ठिकाणे या दहशतवाद्यांनी दाखवली आहेत. काझी याने दहशतवाद्यांना रोख आणि ऑनलाइन पद्धतीने पैशाची मदत केल्याचे निष्पन्न झाले आहे.
