रत्नागिरी: भाजपच्या प्रत्येक कार्यकर्त्याने केवळ राजकीय पदांसाठी काम न करता गावागावात राष्ट्रभक्त नागरिक घडवण्यासाठी मैदानात उतरले पाहिजे, असे थेट आणि आक्रमक आवाहन भाजप प्रदेशाध्यक्ष रवींद्र चव्हाण यांनी केले आहे. रत्नागिरीत पार पडलेल्या भाजप दक्षिण रत्नागिरी जिल्हा कार्यकारिणीच्या आढावा बैठकीत ते बोलत होते.
या बैठकीमध्ये आगामी राजकीय आव्हाने, संघटना बांधणी आणि कोकणातील स्थानिक विकासावर सविस्तर मंथन झाले. यावेळी कोकणातील तरुणांना शासकीय नोकऱ्यांमध्ये प्राधान्य मिळावे यासह अनेक महत्त्वपूर्ण ठरावांना मंजुरी देण्यात आली.
‘कोणीही खचून जाऊ नका; संघटन मजबूत करा’
उपस्थित कार्यकर्त्यांना मार्गदर्शन करताना रवींद्र चव्हाण म्हणाले की, “रत्नागिरी-सिंधुदुर्ग लोकसभा मतदारसंघात आज भाजपचा खासदार आहे, अनेक नगर परिषदांमध्ये आपले नगराध्यक्ष, उपनगराध्यक्ष आणि नगरसेवक जनतेच्या सेवेत सक्रिय आहेत. त्यामुळे कोणत्याही कार्यकर्त्याने खचून जाण्याचे कारण नाही. सर्वांनी तन-मन-धनाने पक्षाच्या विचारांशी प्रामाणिक राहून पक्षसंघटना तळागाळापर्यंत नेली पाहिजे.”
तसेच, पंतप्रधान नरेंद्र मोदी आणि उपमुख्यमंत्री देवेंद्र फडणवीस यांच्या नेतृत्वाखाली सुरू असलेल्या लोककल्याणकारी योजनांचा लाभ समाजातील शेवटच्या घटकापर्यंत कसा पोहोचवता येईल, यावर भर देण्याचे निर्देशही त्यांनी दिले.
स्थानिक तरुणांना शासकीय भरतीत प्राधान्य: महत्त्वाचा ठराव मंजूर
या बैठकीत कोकणातील रोजगाराच्या समस्येवर आमदार प्रमोद जठार यांनी लक्ष वेधले. कोकणातील शासकीय भरती प्रक्रियेत स्थानिक सुशिक्षित तरुणांना जास्तीत जास्त प्राधान्य मिळाले पाहिजे, अशी ठाम मागणी त्यांनी मांडली. “कोकणातील तरुणांना स्थानिक पातळीवर नोकऱ्या मिळाल्या, तर रोजगारासाठी होणारे स्थलांतर थांबेल आणि गावागावांतील बंद पडलेली घरे पुन्हा गजबजतील,” असा विश्वास त्यांनी व्यक्त केला. या विषयावर राज्य सरकारसोबत संयुक्त बैठक घेण्याबाबतचा ठराव बैठकीत एकमुखाने मंजूर करण्यात आला.
मतदार नोंदणी आणि संघटनात्मक ताकद
कोकण पदवीधर मतदारसंघाचे आमदार निरंजन डावखरे यांनी मतदार नोंदणी प्रक्रियेविषयी मार्गदर्शन केले. ज्या पदवीधरांची नावे अद्याप मतदार यादीत आलेली नाहीत, त्यांची नोंदणी करून घेण्यासाठी कार्यकर्त्यांनी वैयक्तिक पातळीवर पुढाकार घ्यावा, असे आवाहन त्यांनी केले. तर दक्षिण रत्नागिरी जिल्हाध्यक्ष प्रशांत यादव यांनी जिल्ह्यातील प्रशिक्षण वर्गांचा आढावा देत, आगामी काळात रत्नागिरीत भाजप ‘शत-प्रतिशत’ करण्यासाठी सर्व कार्यकर्ते सज्ज असल्याचे स्पष्ट केले.
या महत्त्वपूर्ण बैठकीस भाजप प्रदेश सरचिटणीस योगेश सागर, माजी आमदार डॉ. विनय नातू, जिल्हा परिषद सदस्य प्रमोद अधटराव, रत्नागिरीचे उपनगराध्यक्ष समीर तिवरेकर, देवरूखच्या नगराध्यक्षा मृणाल शेट्ये यांच्यासह जिल्ह्यातील विविध मंडळांचे पदाधिकारी व कार्यकर्ते मोठ्या संख्येने उपस्थित होते.
