देवरुख: कोकण रेल्वे मार्गावरील अत्यंत महत्त्वाच्या अशा संगमेश्वर रोड रेल्वे स्थानकावर चार प्रमुख साप्ताहिक एक्सप्रेस गाड्यांना थांबा देण्यात यावा, ही नागरिकांची व प्रवाशांची अनेक वर्षांपासूनची अत्यंत न्याय्य मागणी आहे. मात्र, प्रशासनाच्या दिरंगाईमुळे हा प्रश्न अजूनही प्रलंबित राहिला आहे. आता या प्रश्नी शिवसेना (उद्धव बाळासाहेब ठाकरे) पक्षाने आक्रमक भूमिका घेतली असून, कोकण रेल्वे प्रशासनाला जाब विचारत यावर लवकरात लवकर ठोस निर्णय घेण्याची मागणी केली आहे.
जिल्हा परिषद सदस्यांचे थेट कोकण रेल्वेच्या सीएमडियांना पत्र
संगमेश्वरमधील प्रवाशांच्या होत असलेल्या गैरसोयीची गंभीर दखल घेत जिल्हा परिषद सदस्य संतोष थेराडे यांनी थेट कोकण रेल्वेचे अध्यक्ष व व्यवस्थापकीय संचालक (CMD) संतोष कुमार झा यांना एक पत्र पाठवले आहे. या पत्राच्या माध्यमातून त्यांनी रेल्वे प्रशासनाकडे या प्रकरणावर तात्काळ उच्चस्तरीय संयुक्त बैठक आयोजित करण्याची ठाम मागणी केली आहे.
कोणत्या चार एक्सप्रेस गाड्यांचा आहे प्रस्ताव?
स्थानिक प्रवाशांच्या सोयीसाठी संगमेश्वर रोड रेल्वे स्थानकावर खालील चार साप्ताहिक एक्सप्रेस गाड्यांना थांबा मिळावा, अशी प्रमुख मागणी आहे:
-
बांद्रा – मडगाव एक्सप्रेस (१०११५/१६)
-
श्री गंगानगर एक्सप्रेस (१६३११/१२)
-
अजमेर – एरणाकुलम मरुसागर एक्सप्रेस (१२९७७/७८)
-
जबलपूर – कोईम्बतूर एक्सप्रेस (०२१९७/९८)
या गाड्यांच्या थांब्याबाबतचा प्रस्ताव पाठवून तब्बल सात महिन्यांहून अधिक काळ लोटला आहे. तरीही केंद्रीय रेल्वे बोर्डाकडून यावर कोणताही अंतिम निर्णय घेण्यात आलेला नाही, ज्यामुळे संगमेश्वरमधील प्रवासी वर्गामध्ये आणि नागरिकांमध्ये तीव्र संताप व नाराजी पसरली आहे.
‘जनपत्र मोहिमे’ला तुफान प्रतिसाद
या प्रलंबित मागणीला अधिक बळ देण्यासाठी आणि प्रशासनाचे डोळे उघडण्यासाठी संगमेश्वरच्या नागरिकांनी प्रभावी ‘जनपत्र मोहीम’ सुरू केली आहे. या मोहिमेअंतर्गत नागरिक मोठ्या संख्येने कोकण रेल्वेच्या वरिष्ठ अधिकाऱ्यांना विनंती अर्ज पाठवत आहेत. या जनआंदोलनाला लोकांचा उत्स्फूर्त व प्रचंड पाठिंबा मिळत असून, आता तरी रेल्वे प्रशासन जनतेच्या या भावनांची दखल घेणार का, असा सवाल उपस्थित केला जात आहे.
संयुक्त बैठकीची आक्रमक मागणी
प्रशासकीय पातळीवर सुरू असलेल्या दिरंगाईवर तोडगा काढण्यासाठी कोकण रेल्वेचे वरिष्ठ अधिकारी, स्थानिक लोकप्रतिनिधी आणि प्रवासी प्रतिनिधी यांची एक संयुक्त बैठक तातडीने बोलवावी, अशी आग्रही मागणी संतोष थेराडे यांनी केली आहे. या बैठकीत प्रस्तावाच्या सद्यस्थितीवर, रेल्वे बोर्डाकडील कार्यवाहीवर आणि निर्णयातील विलंबाच्या कारणांवर सविस्तर चर्चा व्हावी, अशी अपेक्षा व्यक्त करण्यात येत आहे. या प्रश्नाने आता तीव्र जनआंदोलनाचे स्वरूप धारण केल्याने कोकण रेल्वे प्रशासन यावर काय पावले उचलणार, याकडे संपूर्ण संगमेश्वर तालुक्याचे लक्ष लागले आहे.
