खेड (रत्नागिरी): रत्नागिरी जिल्ह्यातील खेड तालुक्यातून एक अत्यंत संतापजनक आणि धक्कादायक प्रकार समोर आला आहे. कशेडी सुतारवाडी येथे जुन्या वादातून आणि कौटुंबिक पूर्ववैमनस्यातून एका दांपत्यावर तब्बल १० जणांच्या टोळक्याने घरात घुसून प्राणघातक हल्ला केला. हातात लाठ्याकाठ्या, लोखंडी पाईप, दगड आणि कोयत्यासारखी धोकादायक शस्त्रे घेऊन आलेल्या या टोळक्याने दांपत्याला बेदम मारहाण केली.
नेमके काय घडले?
ही घटना ७ जून रोजी सकाळी १०:०० वाजण्याच्या सुमारास घडली. पीडित महिला सीमा सुरेश दरेकर आणि त्यांचे पती आपल्या घरी नेहमीप्रमाणे काम करत होते. त्याच वेळी अचानक आरोपी १ ते १० हे हातात प्राणघातक हत्यारे घेऊन त्यांच्या घरात अनधिकृतपणे घुसले. फिर्यादी व त्यांच्या पतीला जिवे मारण्याच्या उद्देशाने त्यांनी थेट अंगावर धावून जात जोरदार हल्ला चढवला.
मारहाणीदरम्यान आरोपींनी सीमा दरेकर यांना अश्लील शिवीगाळ करत त्यांची लज्जा उत्पन्न होईल असे वर्तनही केले. अचानक झालेल्या या हल्ल्यामुळे परिसरात आणि कुटुंबात प्रचंड घबराटीचे वातावरण निर्माण झाले होते.
१० जणांविरोधात खेड पोलिसांत गुन्हा
या गंभीर हल्ल्याप्रकरणी पीडित महिला सीमा दरेकर यांनी दिलेल्या तक्रारीवरून २१ जुलै रोजी खेड पोलीस ठाण्यात गुन्हा दाखल करण्यात आला आहे.
गुन्हा दाखल झालेल्या आरोपींची नावे:
-
चंद्रकांत नारायण दरेकर (रा. कशेडी सुतारवाडी)
-
उज्ज्वला चंद्रकांत दरेकर (रा. कशेडी सुतारवाडी)
-
मनिष चंद्रकांत दरेकर (रा. कशेडी सुतारवाडी)
-
राजेश्री राजेश दरेकर (रा. कशेडी सुतारवाडी)
-
रघुनाथ मोरे (रा. कशेडी सुतारवाडी)
-
उर्मिला रघुनाथ मोरे (रा. कशेडी सुतारवाडी)
-
विक्रांत चंद्रकांत दरेकर (मूळ रा. कशेडी सुतारवाडी, सध्या रा. मुंबई)
-
प्राची विक्रांत दरेकर (मूळ रा. कशेडी सुतारवाडी, सध्या रा. मुंबई)
-
तेजस मुकेश दरेकर (मूळ रा. कशेडी सुतारवाडी, सध्या रा. मुंबई)
-
सुप्रिया प्रशांत पाटील (मूळ रा. कशेडी सुतारवाडी, सध्या रा. खेड)
हल्ल्यात सहभागी असलेले आरोपी हे स्थानिक रहिवाशांसह मुंबई आणि खेड परिसरात राहणारे आहेत. याप्रकरणी खेड पोलीस ठाण्यात भारतीय न्याय संहितेच्या विविध कलमांन्वये गंभीर गुन्हा नोंदवण्यात आला असून, पोलीस या प्रकरणाचा सखोल तपास करत आहेत.
