रत्नागिरी: कोकणचा राजा मान्सून सध्या रत्नागिरी जिल्ह्यात पूर्ण रंगात आला आहे. गेल्या २४ तासांत जिल्ह्याला पावसाने अक्षरशः झोडपून काढले असून, ठिकठिकाणी मुसळधार पाऊस कोसळत आहे. जिल्हा नियंत्रण कक्षाने दिलेल्या माहितीनुसार, मंगळवारी सकाळपर्यंत संपलेल्या २४ तासांत रत्नागिरी तालुक्यात सर्वाधिक ९१ मिमी पावसाची नोंद झाली आहे.
या कोसळणाऱ्या संततधार पावसामुळे जिल्ह्यातील जगबुडी, वशिष्ठी, शास्त्री, सोनवी, काजळी, कोदवली, मुचकुंडी आणि बावनदी या सर्व प्रमुख नद्यांच्या पाणीपातळीत झपाट्याने वाढ झाली आहे. नद्यांचे रूप जरी विस्तारले असले, तरी सुदैवाने अद्याप एकही नदी धोक्याच्या किंवा सतर्कता पातळीच्या (Alert Level) वर गेलेली नाही. सर्व नद्यांचा प्रवाह सध्या नियंत्रणात असून, जिल्ह्यात तातडीने पूर परिस्थिती निर्माण होण्याचा कोणताही धोका नाही, असा निर्वाळा जिल्हा प्रशासनाने दिला आहे.
गुहागर, राजापूर आणि दापोलीतही पावसाची बॅटिंग
फक्त रत्नागिरी शहरातच नव्हे, तर ग्रामीण भागात आणि इतर तालुक्यांमध्येही पावसाची जोरदार हजेरी पाहायला मिळत आहे. रत्नागिरीपाठोपाठ गुहागर तालुक्यात ७६ मिमी इतका चांगला पाऊस झाला आहे. तर राजापूरमध्ये ४६.६३ मिमी, दापोलीत ४५ मिमी आणि खेड तालुक्यात ४१.७१ मिमी पावसाची नोंद झाली आहे. संपूर्ण जिल्ह्याचा विचार केला तर गेल्या २४ तासांत सरासरी ४६.६६ मिमी पाऊस झाला असून, जिल्ह्याचा एकूण पावसाचा आकडा आता ४१९.९५ मिमीवर पोहोचला आहे. यामुळे ग्रामीण भागातील ओढे, नाले तुडुंब भरून वाहू लागले आहेत.
जनजीवन विस्कळीत, पण बळीराजा सुखावला!
या मुसळधार पावसामुळे सखल भागांमध्ये पाणी साचायला सुरुवात झाली आहे, ज्यामुळे वाहतुकीचा वेग मंदावला असून नेहमीच्या कामासाठी बाहेर पडणाऱ्या नागरिकांची काहीशी तारांबळ उडाली आहे. मात्र, हा पाऊस जिल्ह्यासाठी एका मोठ्या संकटातून सुटका करणारा ठरत आहे.
गेल्या अनेक महिन्यांपासून कोरड्या पडत चाललेल्या धरणांमध्ये आता नवा जलसाठा जमा होऊ लागला आहे, ज्यामुळे आगामी काळातील पिण्याच्या पाण्याचा प्रश्न मिटण्यास मदत होईल. दुसरीकडे, या दमदार पावसामुळे शेतात चिखल तयार झाल्याने आणि पाण्याचे पाट वाहू लागल्याने बळीराजा कमालीचा सुखावला आहे. खोळंबलेल्या शेतीच्या कामांनी वेग घेतला असून, पेरण्या सुरक्षित झाल्यामुळे शेतकऱ्यांमध्ये आनंदाचे वातावरण आहे.
