रत्नागिरी: ग्रामीण भागातील नागरिकांच्या आरोग्याचा कणा मानल्या जाणाऱ्या प्राथमिक आरोग्य केंद्रांचा (PHC) कारभार आता अधिक सुरक्षित, शिस्तबद्ध आणि पारदर्शक होणार आहे. रत्नागिरी जिल्ह्यातील सर्व प्राथमिक आरोग्य केंद्रांमध्ये सुरक्षेच्या कारणास्तव सीसीटीव्ही कॅमेरे बसवण्याचा महत्त्वपूर्ण निर्णय जिल्हा परिषद आरोग्य समितीच्या बैठकीत घेण्यात आला आहे.
पहिल्या टप्प्यात प्रायोगिक तत्त्वावर सीसीटीव्ही
रत्नागिरी जिल्ह्यात एकूण ६० प्राथमिक आरोग्य केंद्र कार्यरत आहेत. या सर्व केंद्रांमधील सुरक्षा व्यवस्था अधिक बळकट करण्यासाठी पहिल्या टप्प्यात काही निवडक केंद्रांवर प्रायोगिक तत्त्वावर (Pilot Basis) सीसीटीव्ही कॅमेरे बसवले जाणार आहेत. हा प्रयोग यशस्वी झाल्यानंतर उर्वरित केंद्रांमध्ये टप्प्याटप्प्याने कॅमेरे बसवले जातील, अशी माहिती जिल्हा परिषदेचे उपाध्यक्ष तथा आरोग्य सभापती विलास चाळके यांनी दिली. या निर्णयामुळे आरोग्य केंद्रांमधील रुग्णांची सुरक्षा सुनिश्चित होईलच, शिवाय कर्मचाऱ्यांच्या उपस्थितीवर आणि कामकाजावरही लक्ष ठेवणे सोपे होणार आहे.
भात कापणीच्या हंगामात सर्पदंश लसींचा पुरेसा साठा ठेवण्याचे निर्देश
कोकणात लवकरच भात कापणीच्या कामांना वेग येणार आहे. शेतातील कामांदरम्यान शेतकऱ्यांना व शेतमजुरांना सर्पदंश होण्याचा धोका सर्वाधिक असतो. ही बाब लक्षात घेऊन सभापती चाळके यांनी सर्व प्राथमिक आरोग्य केंद्रांमध्ये सर्पदंशावरील प्रतिबंधक लसींचा (Anti-Snake Venom) मुबलक साठा २४ तास उपलब्ध ठेवण्याचे कडक निर्देश दिले आहेत. ऐनवेळी औषधांचा तुटवडा भासून कोणत्याही रुग्णाची गैरसोय होणार नाही, याची विशेष दक्षता घेण्यास सांगण्यात आले आहे.
स्वाईन फ्लू रोखण्यासाठी जनजागृती आणि जंतनाशक मोहीम
मुंबई, पुण्यासारख्या महानगरांमध्ये स्वाईन फ्लूच्या रुग्णांमध्ये वाढ होत असल्याच्या पार्श्वभूमीवर रत्नागिरी आरोग्य यंत्रणेला वेळीच सतर्क राहण्याचे आदेश देण्यात आले आहेत. जिल्ह्यात संसर्ग पसरू नये यासाठी तालुका स्तरावर तातडीने व्यापक जनजागृती मोहीम राबवली जाईल. याशिवाय, लहान मुलांच्या आरोग्यासाठी येत्या २७ ऑक्टोबर रोजी संपूर्ण जिल्ह्यात जंतनाशक मोहीम प्रभावीपणे राबवण्याचा निर्णयही बैठकीत घेण्यात आला.
कर्मचाऱ्यांचे वेतन वेळेत आणि थेट ऑनलाइन होणार
आरोग्य केंद्रांमधील बाह्यरुग्ण विभागाची (OPD) व्याप्ती वाढवून जास्तीत जास्त गरजू रुग्णांपर्यंत दर्जेदार सेवा पोहोचवण्यावर भर देण्याच्या सूचना यावेळी करण्यात आल्या. तसेच शासकीय योजनांच्या निधीच्या खर्चाचा पारदर्शक अहवाल सादर करण्याचे निर्देश दिले.
विशेषतः आरोग्य केंद्रांच्या स्वच्छतेची धुरा सांभाळणाऱ्या सफाई कामगारांचे वेतन वेळेवर आणि थेट ऑनलाइन पद्धतीने त्यांच्या बँक खात्यात जमा करण्यात यावे, असा मानवीय आणि महत्त्वाचा निर्णयही सभापतींनी यावेळी घेतला.
जिल्हा परिषद सभागृहात झालेल्या या बैठकीस आरोग्य समिती सदस्य महेंद्र मांडवकर, विक्रांत जाधव, संतोष थेराडे, जिल्हा आरोग्य अधिकारी अनिरुद्ध आठल्ये आणि अतिरिक्त जिल्हा आरोग्य अधिकारी महेंद्र गावडे यांच्यासह प्रमुख अधिकारी उपस्थित होते.
