संगमेश्वर: आपल्या हक्कांच्या मागण्यांसाठी मोर्चे, घोषणाबाजी किंवा रेल रोको आंदोलने आपण नेहमीच पाहतो. मात्र, कोकणात आपल्या न्याय्य हक्कासाठी रेल्वे प्रशासनाचे डोळे उघडायला चक्क गणपती बाप्पाचे वाहन असलेल्या ‘उंदीरमामा’लाच मैदानात उतरावे लागले! कोकण रेल्वेच्या संगमेश्वर रोड स्थानकावर प्रवाशांच्या सोयीसाठी महत्त्वाच्या एक्स्प्रेस गाड्यांना थांबा मिळावा, या मागणीसाठी एका स्थानिक आंदोलकाने उंदीरमामाची हुबेहूब वेशभूषा परिधान करून केलेले हे अभिनव आंदोलन सध्या संपूर्ण कोकणात कौतुकाचा आणि चर्चेचा विषय ठरले आहे.
तक्रार वहीत अधिकृत नोंद
सध्या गणेशोत्सवाचा काळ असल्याने संपूर्ण कोकण बाप्पाच्या भक्तीत तल्लीन आहे. लाखो चाकरमानी आपल्या गावी आले असून आता त्यांच्या परतीच्या प्रवासाची लगबग सुरू झाली आहे. अशा गर्दीच्या काळात प्रवाशांची होणारी परवड लक्षात घेऊन आंदोलकाने थेट संगमेश्वर रोड रेल्वेस्थानक गाठले. उंदीरमामाच्या रूपात आलेल्या या आंदोलकाने कोणत्याही प्रकारचा गोंधळ न घालता शांततापूर्ण मार्गाने थेट स्टेशन मास्तरांची भेट घेतली. रेल्वेस्थानकावरील अधिकृत ‘तक्रार वही’मध्ये (Complaint Book) प्रवाशांच्या मागण्यांची रीतसर नोंद करून प्रशासनाचे लक्ष वेधले.
कोणत्या ४ एक्स्प्रेस गाड्यांना थांब्याची गरज?
संगमेश्वर तालुका आणि परिसरातील हजारो प्रवाशांची सोय व्हावी यासाठी खालील चार प्रमुख साप्ताहिक एक्स्प्रेस गाड्यांना संगमेश्वर रोड स्थानकावर त्वरित थांबा मंजूर करावा, अशी आग्रही मागणी करण्यात आली आहे:
-
१०११५ / १०११६ – वांद्रे-मडगाव एक्स्प्रेस
-
१६३११ / १६३१२ – श्री गंगानगर एक्स्प्रेस
-
१२९७७ / १२९७८ – अजमेर-एर्नाकुलम एक्स्प्रेस
-
०२१९७ / ०२१९८ – जबलपूर-कोईमतूर एक्स्प्रेस
थांबा मिळाल्यास चाकरमान्यांना काय फायदा होणार?
संगमेश्वर हे परिसरातील अनेक ग्रामीण भागांचे मध्यवर्ती केंद्र आहे. मुंबईसह देशभरातील विविध राज्यांमध्ये संगमेश्वर तालुक्यातील नागरिक नोकरी-व्यवसायानिमित्त मोठ्या प्रमाणावर वास्तव्यास आहेत.
या चारही एक्स्प्रेस गाड्यांना संगमेश्वर येथे थांबा मिळाल्यास प्रवाशांना थेट मुंबई, राजस्थान, उत्तर भारत, केरळ, मध्य प्रदेश आणि दक्षिण भारतातील प्रमुख शहरांशी थेट रेल्वे कनेक्टिव्हिटी मिळणार आहे. परिणामी, वृद्ध, महिला आणि चाकरमान्यांना लांबच्या प्रवासासाठी रत्नागिरी किंवा चिपळूण स्थानकावर जाण्याची कसरत करावी लागणार नाही.
सर्जनशील आंदोलनाचे सर्वत्र कौतुक
कोणतीही सार्वजनिक मालमत्ता न दुखावता, प्रवाशांना वेठीस न धरता लोकशाही मार्गाने आणि कोकणी संस्कृतीशी सुसंगत अशा सर्जनशील पद्धतीने केलेल्या या आंदोलनाचे चाकरमान्यांकडून जोरदार स्वागत केले जात आहे. आता या ‘उंदीरमामा’च्या निवेदनाची दखल घेऊन कोकण रेल्वे प्रशासन या गाड्यांना संगमेश्वर स्थानकावर कधी हिरवा कंदील दाखवते, याकडे संपूर्ण परिसराचे लक्ष लागले आहे.
