दापोलीत आज आदित्य ठाकरे यांच्या सभेला राष्ट्रवादीचा पडलेला आमदार झेंडे लावण्यासाठी बाहेर पडला आहे. गेली सहा वर्ष जे शिवसेनेच्या विरोधात काम करत आहेत, ज्यांनी पूर्वी पक्षाला विरोध दर्शवून सेनेचे भगवे झेंडे जाळले, तेच राष्ट्रवादीचे कार्यकर्ते त्यांच्या नियोजनाच्या बैठकीला उपस्थित होते, असा खळबळजनक आरोप आमदार योगेश कदम यांनी केला आहे. जर आदित्य ठाकरे राष्ट्रवादीच्या कार्यकर्त्यांच्या जीवावर कोकण दौऱ्याचे नियोजन करणार असतील, तर दापोली मतदार संघातील त्यांची परिस्थिती कशी असेल हे मला वेगळी सांगण्याची गरज नाही, असंही योगेश कदम थेट म्हणाले.
काही महिन्यापूर्वी दापोलीमध्ये झालेल्या जाहीर सभेत आदित्य ठाकरे यांनी माझा ‘मित्र’ म्हणून उल्लेख केला होता, पण पुढील दोन महिन्यानंतर झालेल्या बैठकीत त्याच आदित्य ठाकरेंनी दापोलीची सीट राष्ट्रवादीला गेली तरी चालेल, पण आमदार योगेश कदम संपला पाहिजे हे कारस्थान माझ्यावर रचले. माझ्यावर सातत्याने अन्याय होत होता, त्यावेळी मला मित्र म्हणवणाऱ्या आदित्य ठाकरे यांना माझ्यावर होत असलेला अन्याय दिसून नाही का आला? असा खडा सवाल आमदार योगेश कदम यांनी उपस्थित केला आहे.
रत्नागिरी जिल्ह्यातील दापोली विधानसभा मतदारसंघाचे आमदार योगेश कदम यांनी मुख्यमंत्री एकनाथ शिंदे यांच्या गटात सामील झाल्यावर पहिल्यांदाच युवासेना प्रमुख आदित्य ठाकरे यांच्याबद्दल जाहीरपणे नाराजी व्यक्त केली. केवळ माझा मित्र म्हणत आदित्य ठाकरे यांनी येथील शिवसैनिकांवर व आपल्यावर कसा अन्याय केला, यावरुन योगेश कदमांनी हल्लाबोल केला आहे. १८ सप्टेंबर रोजी होणाऱ्या सभेत अनेक गोष्टी आपण उघड करणार असल्याचा थेट इशाराच योगेश कदम यांनी दिला आहे. आदित्य ठाकरे यांच्या दौऱ्याच्या पार्श्वभूमीवर योगेश कदम बोलत होते.
