खेड: मुंबई-गोवा महामार्गावर अपघातांची मालिका सुरूच असून शुक्रवारी खेड तालुक्यातील भरणे गवळवाडी हद्दीत एक भीषण अपघात घडला. मुंबईकडून गोव्याच्या दिशेने अतिवेगाने जाणाऱ्या एका क्रेटा कारने पुढे चाललेल्या किया (Kia) कारला पाठीमागून जोरदार धडक दिली. ही धडक इतकी भीषण होती की, धडकेच्या प्रभावाने किया कार रस्त्याच्या कडेला जाऊन पलटी झाली. या अपघातात कर्टेल गावचे सरपंच दिनेश चव्हाण हे सुदैवाने किरकोळ जखमी झाले असून ते बालंबाल वाचले आहेत.
स्थानिकांचे प्रसंगावधान आणि मदतकार्य
अपघात घडताच महामार्गावर मोठा आवाज झाला. आवाज ऐकताच आजूबाजूच्या स्थानिक नागरिकांनी क्षणाचाही विलंब न लावता घटनास्थळाकडे धाव घेतली. किया कार रस्त्याच्या बाजूला उलटल्यामुळे चालक आतमध्ये अडकून पडला होता. स्थानिक ग्रामस्थांनी अत्यंत प्रसंगावधान दाखवत तातडीने मदतकार्य सुरू केले आणि कारमध्ये अडकलेल्या चालकाला सुखरूप बाहेर काढले. स्थानिकांच्या या तत्परतेमुळे मोठा अनर्थ टळला.
क्रेटा कारमधील चौघे पसार, महामार्गावर वाहतूक कोंडी
अपघात घडल्यानंतर पोलीस कारवाईच्या भीतीने क्रेटा कारमधील चौघा जणांनी घटनास्थळावरून पोबारा केला. धडकेमुळे दोन्ही वाहने रस्त्यात आल्याने मुंबई-गोवा महामार्गावरील वाहतुकीचा काही काळ मोठा खोळंबा झाला होता. वाहनांच्या लांबच लांब रांगा लागल्यामुळे प्रवाशांना काही वेळ ताटकळत राहावे लागले.
घटनास्थळाची माहिती मिळताच खेड पोलीस ठाण्याचे पथक तातडीने अपघातस्थळी दाखल झाले. पोलिसांनी स्थानिक नागरिकांच्या मदतीने अपघातग्रस्त वाहने रस्त्याच्या बाजूला हलवून ठप्प झालेली वाहतूक पूर्ववत केली. या अपघाताची नोंद खेड पोलीस ठाण्यात करण्यात आली असून फरार झालेल्या क्रेटा कारमधील प्रवाशांचा पोलीस शोध घेत आहेत.
