रत्नागिरी: रत्नागिरी शहर पोलीस ठाण्याच्या हद्दीत अवैध अमली पदार्थांची विक्री आणि साठवणुकीविरोधात करण्यात आलेल्या एका कारवाईतील संशयित आरोपीला उच्च न्यायालयाकडून मोठा दिलासा मिळाला आहे. ८८ पाकिटांमध्ये ८ ग्रॅम हेरॉईन बाळगल्याप्रकरणी अटकेत असलेला संशयित अद्वैत संदेश चवंडे याला मुंबई उच्च न्यायालयाच्या कोल्हापूर सर्किट बेंचने नियमित जामीन मंजूर केला आहे.
न्यायमूर्ती मेहरोज के. पठाण यांच्या खंडपीठासमोर या प्रकरणाची सुनावणी पार पडली. दोन्ही बाजूंच्या वकिलांचा युक्तिवाद आणि मांडलेले पुरावे लक्षात घेतल्यानंतर न्यायालयाने ५ ऑगस्ट रोजी संशयिताला जामीन देण्याचा निर्णय दिला.
नेमकी काय होती घटना?
अमली पदार्थांच्या अवैध विक्रीवर अंकुश ठेवण्यासाठी रत्नागिरी शहर पोलीस ठाण्याच्या अमली पदार्थविरोधी पथकाने २७ जून २०२५ रोजी एका विशेष मोहिमेअंतर्गत कारवाई केली होती. या कारवाईदरम्यान संशयित अद्वैत चवंडे याला ताब्यात घेण्यात आले होते. त्याच्या अंगझडती आणि चौकशीत पोलिसांना ८८ लहान पाकिटांमध्ये ठेवलेले सुमारे ८ ग्रॅम ‘हेरॉईन’ हा अत्यंत घातक अमली पदार्थ आढळून आला होता.
पोलिसांनी तात्काळ हा मुद्देमाल जप्त केला आणि संशयिताविरोधात ‘एनडीपीएस’ (NDPS – Narcotic Drugs and Psychotropic Substances) कायद्याच्या कलम ८ (क) व २१ (ब) अन्वये गुन्हा दाखल करून त्याला अटक केली होती.
न्यायालयीन लढा आणि जामिनाचा निर्णय
अटकेनंतर संशयित आरोपीच्या वतीने जामिनासाठी न्यायालयात अर्ज करण्यात आला होता. स्थानिक पातळीवर जामीन फेटाळला गेल्यानंतर या प्रकरणाची याचिका मुंबई उच्च न्यायालयाच्या कोल्हापूर सर्किट बेंचमध्ये दाखल करण्यात आली.
सुनावणीदरम्यान बचाव पक्ष आणि सरकारी पक्षाचा सविस्तर युक्तिवाद ऐकून घेत न्यायमूर्ती मेहरोज के. पठाण यांनी संशयिताला नियमित जामीन देण्याचा आदेश जारी केला. सर्व न्यायालयीन प्रक्रिया पूर्ण झाल्यानंतर त्याची कारागृहातून सुटका केली जाणार आहे.
