रत्नागिरी: मुंबई-गोवा राष्ट्रीय महामार्गावरून प्रवास करताना प्रवाशांना अनेक अडचणींचा सामना करावा लागतो. अशा प्रवासात पिण्याच्या शुद्ध पाण्याची सोय असणे हे अत्यंत गरजेचे असते. हीच बाब ओळखून महामार्गावरील मोक्याच्या ठिकाणी असलेल्या हातखंबा पोलीस मदत केंद्राने एक कौतुकास्पद व संवेदनशील पाऊल उचलले आहे. प्रवाशांसह कर्तव्य बजावणाऱ्या पोलिसांना शुद्ध व सुरक्षित पाणी मिळावे, यासाठी या केंद्रात ‘एक्वागार्ड’ (वॉटर प्युरिफायर) बसवण्यात आला आहे.
हातखंबा पोलीस मदत केंद्राचे प्रभारी सहायक पोलीस निरीक्षक (API) घुले यांच्या मार्गदर्शनाखाली पोलीस अंमलदार नितीन जाधवर यांनी या कामासाठी विशेष पुढाकार घेतला.
तहानलेल्या प्रवाशांना मोठा दिलासा
मुंबई-गोवा महामार्गावरील हातखंबा हा अत्यंत महत्त्वाचा जंक्शन पॉईंट मानला जातो. कोकणात जाणारी-येणारी वाहने, एसटी बसेस आणि पर्यटकांची येथे २४ तास वर्दळ असते. प्रवासादरम्यान अनेकदा लहान मुले, ज्येष्ठ नागरिक आणि वाहनचालकांना पिण्याच्या पाण्यासाठी इकडेतिकडे भटकावे लागत होते किंवा हॉटेल-दुकानांवर अवलंबून राहावे लागत होते. तसेच, कडक उन्हात आणि प्रतिकूल हवामानात २४ तास डोळ्यांत तेल घालून कर्तव्य बजावणाऱ्या पोलिसांनाही पिण्याच्या पाण्यासाठी मोठी कसरत करावी लागत असे.
ही दैनंदिन अडचण आणि गैरसोय लक्षात घेऊन पोलीस अंमलदार नितीन जाधवर यांनी पुढाकार घेतला आणि केंद्रात तातडीने आधुनिक वॉटर प्युरिफायर बसवण्याचा निर्णय घेतला. या सुविधेमुळे आता येथे येणाऱ्या प्रवाशांना तसेच कर्तव्यावर असणाऱ्या सर्व पोलीस कर्मचाऱ्यांना थंड आणि शुद्ध पाणी अगदी सहज उपलब्ध होत आहे.
नागरिक आणि वाहनचालकांकडून भरभरून कौतुक
पोलीस ठाणे किंवा मदत केंद्र म्हणजे केवळ कायदेविषयक बाबी किंवा तपासकामाचे ठिकाण असा सर्वसामान्य समज असतो. मात्र, हातखंबा पोलिसांनी घेतलेल्या या संवेदनशील निर्णयाने पोलिसांमधील माणुसकीचे दर्शन घडवले आहे. महामार्गावरून प्रवास करणाऱ्या प्रवाशांनी, वाहनचालकांनी आणि स्थानिक नागरिकांनी पोलिसांच्या या लोककल्याणकारी उपक्रमाचे मनापासून स्वागत करत कौतुक केले आहे. या उपक्रमामुळे नागरिकांच्या मनातील पोलिसांबद्दलचा आदर आणि आपुलकी आणखी वृद्धिंगत होत आहे.
