चिपळूण तालुक्यातील औद्योगिकदृष्ट्या अत्यंत महत्त्वाच्या असलेल्या खेर्डी गाव आणि खेर्डी एमआयडीसी परिसरासाठी एक अत्यंत दिलासादायक आणि महत्त्वाची बातमी समोर आली आहे. या भागात वारंवार घडणाऱ्या आगीच्या दुर्घटनांची गंभीर दखल घेत, येथे एका स्वतंत्र फायर स्टेशन (अग्निशमन केंद्र) उभारणीच्या प्रत्यक्ष कामाला सुरुवात झाली आहे. या महत्त्वाकांक्षी प्रकल्पामुळे येथील उद्योजक, कामगार आणि स्थानिक नागरिकांमधून प्रचंड समाधान व्यक्त केले जात आहे.
तीन वर्षांच्या सातत्यपूर्ण पाठपुराव्याला यश
खेर्डी आणि एमआयडीसी परिसरात भविष्यात आग किंवा अन्य आपत्कालीन दुर्घटना घडल्यास तातडीने मदत मिळावी, यासाठी येथे स्वतंत्र फायर स्टेशन असावे, ही मागणी गेल्या तीन ते चार वर्षांपासून लावून धरण्यात आली होती. युवासेना सरचिटणीस (रायगड-रत्नागिरी लोकसभा) उमेद खताते यांनी या प्रश्नावर सातत्याने पाठपुरावा केला होता.
यासाठी त्यांनी संबंधित मंत्र्यांकडे वेळोवेळी पत्रव्यवहार केला होता. काही महिन्यांपूर्वी खेर्डी परिसरात घडलेल्या एका आगीच्या दुर्घटनेनंतर या समस्येचे गांभीर्य अधिकच वाढले होते. त्यानंतर गणेशोत्सवाच्या काळात उमेश खताते यांनी उद्योगमंत्री तथा रत्नागिरीचे पालकमंत्री उदय सामंत यांची प्रत्यक्ष भेट घेऊन खेर्डीमध्ये तातडीने फायर स्टेशन मंजूर करण्याची आग्रही मागणी केली होती.
पालकमंत्र्यांच्या आदेशानंतर हालचालींना वेग
स्थानिकांच्या या अत्यंत जिव्हाळ्याच्या आणि सुरक्षिततेच्या प्रश्नाची पालकमंत्री उदय सामंत यांनी तातडीने गांभीर्याने दखल घेतली. त्यांनी संबंधित यंत्रणेला त्वरित आदेश देत या प्रक्रियेला गती दिली. शासनाच्या सकारात्मक भूमिकेमुळे आणि जलद मंजुरीमुळे आता प्रत्यक्ष कामाला प्रारंभ झाला असून, लवकरच हे फायर स्टेशन पूर्णपणे कार्यान्वित होणार आहे.
उद्योजक व ग्रामस्थांकडून कृतज्ञता
नवीन फायर स्टेशनमुळे एमआयडीसीमधील हजारो कामगार, उद्योजक, व्यापारी वर्ग तसेच खेर्डी आणि लगतच्या गावांतील नागरिकांना आपत्कालीन परिस्थितीत तत्काळ मदत मिळण्याचा मार्ग मोकळा झाला आहे. या महत्त्वाच्या प्रकल्पासाठी पुढाकार घेतल्याबद्दल ग्रामस्थ व व्यापाऱ्यांनी पालकमंत्री उदय सामंत आणि युवासेना सरचिटणीस उमेश खताते यांचे विशेष आभार मानले आहेत. खेर्डीच्या सुरक्षेच्या दृष्टीने हा एक ऐतिहासिक टप्पा मानला जात आहे.
