दापोली : रात्रीच्या अंधारात जंगलात दबा धरून बसलेल्या दोघांवर काळाने अचानक आणि अत्यंत दुर्दैवी घाला घातला. दापोली तालुक्यातील दाभोळ नजीकच्या वणौशी-खोंडारण परिसरातील जंगलात शिकारीसाठी गेलेल्या दोघांच्या हातातील गावठी बंदुकीतून अचानक मिसफायर झाला. या भीषण घटनेत बंदुकीचे छर्रे शरीरात घुसल्याने एकाचा जागीच तडफडून मृत्यू झाला, तर दुसरा सहकारी गंभीर जखमी झाला आहे. या धक्कादायक घटनेमुळे संपूर्ण दापोली आणि दाभोळ परिसरात मोठी खळबळ उडाली आहे.
या दुर्घटनेत सचिन शांताराम शिगवण (वय ४४, रा. खोंडारण खालचीवाडी) यांचा मृत्यू झाला असून, त्यांचे साथीदार सुनील पांदले (वय ४८) हे गंभीर जखमी झाले आहेत.
नेमकी घटना कशी घडली?
दाभोळ सागरी पोलिसांनी दिलेल्या माहितीनुसार, सचिन शिगवण आणि सुनील पांदले हे दोघे ३० सप्टेंबरच्या रात्री सिंगल बोअर गावठी बंदूक घेऊन वणौशी-खोंडारण परिसरातील घनदाट जंगलात शिकारीसाठी निघाले होते. रात्रीच्या शांततेत जंगली सावज टप्प्यात येण्याची वाट पाहत दोघेही एका ठिकाणी दबा धरून बसले होते.
त्याच वेळी अचानक सचिन शिगवण यांचा पाय जमिनीवर असलेल्या बंदुकीला लागला आणि अनपेक्षितपणे बंदुकीचा चाप (ट्रिगर) ओढला गेला. क्षणात जोरदार आवाजासह बंदुकीतून गोळी सुटली (मिसफायर झाला).
शरीरात घुसले प्राणघातक छर्रे
बंदुकीतून सुटलेले सुमारे ५ ते ६ छर्रे थेट सचिन शिगवण यांच्या छातीत आणि पोटात घुसले. जखमा इतक्या खोल आणि गंभीर होत्या की सचिन यांचा जागीच तडफडून मृत्यू झाला. तर त्यांच्या अगदी शेजारीच बसलेले सुनील पांदले यांच्या पायात व मांडीतही छर्रे घुसल्याने ते रक्ताच्या थारोळ्यात पडले आणि प्रचंड वेदनेने जागीच बेशुद्ध झाले.
काही वेळाने शुद्धीवर आल्यावर पांदले यांनी स्वतःला सावरत मोबाईलवरून गावातल्या मित्रांशी संपर्क साधून या थरारक घटनेची माहिती दिली. माहिती मिळताच गावातील नागरिकांनी तात्काळ जंगलाच्या दिशेने धाव घेतली. गंभीर जखमी झालेल्या सुनील पांदले यांना तातडीने दापोली उपजिल्हा रुग्णालयात उपचारासाठी हलवण्यात आले असून त्यांच्यावर सध्या उपचार सुरू आहेत.
परिवारावर कोसळला दुःखाचा डोंगर; पोलिसांकडून तपास सुरू
घटनेची माहिती मिळताच दाभोळ सागरी पोलिसांनी घटनास्थळी पोहोचून पंचनामा केला आणि घटनास्थळावरून ती गावठी बंदूक जप्त केली. मृत सचिन शिगवण हे रिक्षा चालवून आपल्या कुटुंबाचा उदरनिर्वाह करत होते. त्यांच्या पश्चात पत्नी आणि मुलगा असा परिवार असून त्यांच्या अचानक जाण्याने कुटुंबावर दुःखाचा डोंगर कोसळला आहे. जखमी सुनील पांदले हे मजुरीची कामे करतात. ही गावठी बंदूक कोणाची होती, ती कुठून आणली गेली होती आणि बेकायदेशीर शस्त्र बाळगण्यामागे कोण आहे, याचा सखोल तपास आता दाभोळ सागरी पोलीस करत आहेत.
बेकायदेशीर शिकारीचा प्रश्न पुन्हा ऐरणीवर
या दुर्दैवी घटनेने दाभोळ आणि आसपासच्या ग्रामीण भागात चालणाऱ्या बेकायदेशीर शिकारीचा मुद्दा पुन्हा एकदा गंभीर वळणावर आला आहे. यापूर्वीही खोंडारण वाडी परिसरात शिकारीदरम्यान गोळी लागून एका निष्पाप तरुणाचा नाहक बळी गेला होता. आता पुन्हा त्याच परिसरात तशाच पद्धतीची घटना घडल्याने वनविभाग आणि स्थानिक पोलिसांच्या गस्तीवर प्रश्नचिन्ह उपस्थित केले जात असून, बेकायदेशीर शिकारीच्या प्रवृत्तीला आळा घालण्याची मागणी नागरिकांमधून जोर धरत आहे.
