रत्नागिरी: कोकणच्या लाल मातीत पिकणाऱ्या अस्सल काजूची चव जगभर प्रसिद्ध आहे. मात्र, गेल्या काही काळापासून काजू उत्पादक शेतकरी आणि स्थानिक काजू प्रक्रिया कारखानदार कच्च्या मालाची टंचाई, साठवणुकीचा अभाव आणि आर्थिक चणचण अशा अनेक संकटांशी लढा देत आहेत. या पार्श्वभूमीवर, जिल्ह्यातील काजू उद्योगाला पुन्हा एकदा गतवैभव मिळवून देण्यासाठी आणि कारखान्यांची चाके अविरत फिरती ठेवण्यासाठी रत्नागिरी जिल्हा काजू प्रक्रियाधारक संघाने कंबर कसली आहे.
रत्नागिरी येथील कृषी उत्पन्न बाजार समितीच्या सभागृहात संघाची सर्वसाधारण बैठक मोठ्या उत्साहात पार पडली. या बैठकीत उद्योग पुन्हा भरभराटीस आणण्यासाठी राज्य शासन आणि ‘महाराष्ट्र काजू बोर्डा’कडे सादर करावयाच्या प्रमुख मागण्यांचा सर्वसमावेशक प्रस्ताव मंजूर करण्यात आला.
काजू उद्योगाच्या पुनरुज्जीवनासाठी प्रस्तावातील प्रमुख मागण्या
स्थानिक शेतकऱ्यांचे हित आणि कारखानदारांचे अस्तित्व टिकवण्यासाठी खालील प्रमुख मागण्या शासनाकडे मांडल्या जाणार आहेत:
-
स्थानिक काजूची जिल्ह्यातच साठवणूक:
जिल्ह्यात पिकणारा उच्च दर्जाचा काजू परराज्यात किंवा बाहेर न जाता स्थानिक पातळीवरच उपलब्ध व्हावा, यासाठी जिल्ह्यात साठवणुकीची व्यवस्था व्हावी. यामुळे स्थानिक प्रक्रिया युनिट्स वर्षातील किमान १० महिने अविरत सुरू राहू शकतील आणि स्थानिकांना कायमस्वरूपी रोजगार मिळेल.
-
तालुकास्तरावर ‘CFC’ व आधुनिक गोदामे:
शेतकरी व लहान कारखानदारांना दर्जेदार साठवणूक आणि आधुनिक तंत्रज्ञान सहज उपलब्ध व्हावे, यासाठी प्रत्येक तालुक्यात ‘कॉमन फॅसिलिटी सेंटर’ (CFC) आणि अद्ययावत गोदामांची उभारणी करणे.
-
कोकणी काजूचे स्वतंत्र ब्रँडिंग व विक्री व्यवस्था:
कोकणातील गोड आणि पौष्टिक काजूगराची स्वतंत्र ओळख निर्माण करण्यासाठी त्याचे शासकीय पातळीवर दर्जेदार ब्रँडिंग करावे आणि थेट विक्रीसाठी हक्काची बाजारपेठ उपलब्ध करून द्यावी.
-
माल तारण कर्ज योजना:
काजू हंगाम सुरू असताना आर्थिक अडचण भासू नये म्हणून कारखानदार आणि शेतकऱ्यांना उभारी देण्यासाठी ‘माल तारण कर्ज योजना’ तातडीने लागू करण्यात यावी.
जिल्ह्याची नवी कार्यकारिणी जाहीर
या सर्वसाधारण बैठकीत पुढील वाटचालीसाठी रत्नागिरी जिल्हा काजू प्रक्रियाधारक संघाची नवी कार्यकारिणी जाहीर करण्यात आली:
-
अध्यक्ष: विवेक बारगीर
-
कार्याध्यक्ष: ओमकार कोलते
-
सचिव: दिनेश पवार
-
खजिनदार: मुकेश देसाई
-
शासकीय संपर्क प्रमुख: प्रताप पवार आणि जयवंत विचारे
तालुकानिहाय संचालक मंडळ:
-
राजापूर: निलेश खानविलकर, रमेश वाडकर, जयेश दळवी
-
लांजा: सचिन जाधव, संदेश पेडणेकर
-
संगमेश्वर: प्रकाश चाळके, स्वाती पवार, सुनीता पाटील
-
रत्नागिरी: संदेश दळवी, हैदर बरमारे, तौफिक खतिब
-
चिपळूण: अजय मोरे, शैलेश साप्ते
-
खेड: प्रणव शेठ, अनिल काटकर
-
गुहागर: संदेश मोरे, संजय गाडगिळ
-
दापोली: राजन साखळकर, प्रशांत पेठे
-
मंडणगड: गिरीश जोशी
शासन दरबारी आवाज उठवण्यासाठी भव्य मेळावा
या बैठकीस महाराष्ट्र काजू बोर्डाचे संचालक धनंजय यादव यांची विशेष उपस्थिती लाभली. नवनिर्वाचित अध्यक्ष विवेक बारगीर यांनी जाहीर केले की, “काजू उद्योगाचे प्रश्न केवळ कागदावर न ठेवता ते तडीस नेण्यासाठी लवकरच जिल्ह्यातील सर्व शेतकरी व कारखानदारांचा एक भव्य मेळावा आयोजित केला जाईल. या मेळाव्यात संबंधित मंत्री, स्थानिक आमदार आणि वरिष्ठ प्रशासकीय अधिकाऱ्यांसमोर थेट मागण्या मांडल्या जातील.”
तसेच शासनाकडे सातत्याने पाठपुरावा करून संकटात सापडलेल्या काजू उद्योगाला पुन्हा उभारी देण्याचा निर्धार शासकीय संपर्क प्रमुख प्रताप पवार यांनी व्यक्त केला.
