लोकसभा निवडणुकीत रत्नागिरी-सिंधुदुर्ग – लोकसभा मतदारसंघातील शिवसेना ठाकरे गटाचे उमेदवार खासदार विनायक राऊत यांना कोकण रिफायनरी विरोधी संघर्ष समितीने आपला पाठींबा जाहीर केला आहे. शिवसेनेच्यावतीने तसा दावा करण्यात आला आहे.’कोकणात पर्यावरणाचा नाश करणारे प्रकल्प आणण्याचा घाट राज्य सरकारने वारंवार केला. मात्र कोकणवासियांनी एकजुटीने त्याला विरोध केला. कोकणी माणूस आणि पर्यावरणासाठी शिवसेना पक्षप्रमुख उद्धव ठाकरे यांनी घेतलेली भूमिका कोकणी माणूस विसरणार नाही.
त्यामुळेच रिफायनरी प्रकल्पविरोधी संघर्ष समितीने (नाणार विभाग) उद्धव ठाकरेंच्या नेतृत्त्वाखालील सर्वसामन्यासाठी झटणाऱ्या शिवसेनेला पाठींबा जाहीर केला आहे. कोकणात कोणत्याही परिस्थितीत महाप्रदूषणकारी पेट्रोकेमिकल रिफायनरी प्रकल्प होता कामा नये ही खासदार विनायक राऊत यांची भूमिका आहे. त्यामुळे राऊत यांना या निवडणुकीत सर्वतोपरी सहकार्य करण्यात येईल, असे कोकण रिफायनरी विरोधी संघर्ष समितीचे उपाध्यक्ष राजाराम कुवरे यांनी सांगितले.
