कोकण रेल्वेच्या मार्गावर खेड तालुक्यात शुक्रवारी (३ जुलै २०२६) सायंकाळी एका काळजाचा थरकाप उडवणारी घटना घडली. मुंबईच्या दिशेने सुसाट धावणाऱ्या मांडवी एक्स्प्रेसमधून मेटे परिसराजवळ एका महिलेसह, पुरुष आणि एका लहान मुलाने अचानक खाली उड्या मारल्या. या धक्कादायक घटनेत शुभ्रा अतिश दिवेकर (वय ३० ते ३५ वर्ष, रा. अंजनी बौद्धवाडी) या महिलेचा रेल्वे रुळाशेजारी कोसळल्याने जागीच दुर्दैवी मृत्यू झाला. तर त्यांच्यासोबत असलेला पुरुष आणि एक लहान मुलगा गंभीर जखमी झाले आहेत.
या प्रकरणाला खरा धक्कादायक वळण तेव्हा मिळालं, जेव्हा पोलिसांनी जखमी पुरुषाची ओळख पटवली. तो साधासुधा प्रवासी नसून खेड पोलिसांच्या रेकॉर्डवरील आणि दोन गंभीर गुन्ह्यांमध्ये गेल्या दोन महिन्यांपासून फरार असलेला अट्टल गुन्हेगार सचिन सत्यवान जुवळे असल्याचं समोर आलं आहे. सध्या सचिन आणि त्या निष्पाप लहान मुलावर कळंबणी उपजिल्हा रुग्णालयात उपचार सुरू आहेत.
पोलीस पाटलांनी सांगितला डोळ्यांनी पाहिलेला प्रसंग
कोतवलीचे पोलीस पाटील श्रीकांत जाधव यांनी दिलेल्या माहितीनुसार, ३ जुलैच्या सायंकाळी साडेसहा ते पावणेसातच्या सुमारास मुंबईकडे जाणारी मांडवी एक्स्प्रेस मेटे परिसराजवळ अचानक थांबली. रेल्वेतून काही लोकांनी उड्या मारल्याची कुणकुण लागताच स्थानिक ग्रामस्थ आणि रेल्वे कर्मचारी घटनास्थळाकडे धावले. तिथे शुभ्रा दिवेकर या रक्ताच्या थारोळ्यात मृतावस्थेत पडलेल्या होत्या. बाजूलाच सचिन जुवळे बेशुद्ध अवस्थेत होता, तर लहान मुलगा गंभीर जखमी असूनही शुद्धीत होता आणि वेदनेने रडत होता. ग्रामस्थांच्या मदतीने तातडीने या दोघांनाही उपचारासाठी खेड येथील रुग्णालयात हलवण्यात आले.
स्वतःचं घर पेटवून फरार झाला होता सचिन!
पोलिसांनी दिलेल्या माहितीनुसार, सचिन जुवळे हा सराईत गुन्हेगार असून पोलीस अनेक दिवसांपासून त्याचा शोध घेत होते. १२ मे २०२६ रोजी त्याने रागाच्या भरात स्वतःचे राहते घर पेटवून दिले होते आणि तेव्हापासून तो पोलिसांना गुंगारा देत होता. १६ मे रोजी त्याची दुचाकी लोटे-आवाशी भागात बेवारस अवस्थेत सापडल्यानंतर पोलिसांनी ती जप्त केली होती. जून महिन्यात तो चिपळूण परिसरात लपल्याची बातमी मिळताच पोलिसांनी मोठी शोधमोहीम आखली होती, पण वालोपे परिसरातील दाट डोंगराचा फायदा घेत तो पुन्हा निसटला होता.
नातेसंबंधांचे गुंतागुंतीचे जाळे आणि सुसाईड नोट
तपासात असे समोर आले आहे की, मृत शुभ्रा दिवेकर या सचिनच्या पत्नी नव्हत्या, तर त्याच्या आतेभावाच्या पत्नी होत्या. आतेभावाच्या निधनानंतर शुभ्रा या सचिनसोबत राहत होत्या. सचिनची पहिली पत्नी आणि मुले सध्या तिच्या माहेरी राहत आहेत. या घटनेत आणखी एक खळबळजनक माहिती समोर येत आहे ती म्हणजे, जखमी सचिनच्या खिशात पोलिसांना उंदीर मारण्याचे औषध आणि एक सुसाईड नोट सापडली आहे. यामुळे हा सामूहिक आत्महत्येचा पूर्वनियोजित कट होता की काय, अशी शंका व्यक्त केली जात आहे. (मात्र, पोलिसांनी अद्याप या सुसाईड नोटबाबत अधिकृत दुजोरा दिलेला नाही.)
खेड पोलिसांकडून सखोल तपास सुरू
घटना घडली तो मेटे परिसर सचिन जुवळे याच्या मूळ गावापासून हाकेच्या अंतरावर आहे. हे तिघे नक्की कोणत्या स्टेशनवरून ट्रेनमध्ये चढले आणि त्यांनी एवढे टोकाचे पाऊल का उचलले, याचे रहस्य अजूनही कायम आहे. खेड पोलीस ठाण्याचे पोलीस निरीक्षक विवेक अहिरे, पोलीस उपनिरीक्षक केंद्रे आणि त्यांचे पथक या प्रकरणाचा सर्व बाजूंनी कसून तपास करत आहेत.
