गुहागर: कोकणातील निसर्गरम्य गुहागर तालुक्याला सध्या एका वेगळ्याच समस्येने ग्रासले आहे आणि ती समस्या म्हणजे महावितरणचा भोंगळ कारभार! गेल्या काही दिवसांपासून गुहागर तालुक्यात विजेचा लपंडाव सुरू असून, ग्रामीण भागातील अनेक गावांमध्ये तब्बल ५ ते ६ दिवस विद्युत पुरवठा पूर्णपणे ठप्प झाला आहे. पाच-पाच दिवस घरात दिवा पेटत नसल्याने नागरिक हैराण झाले आहेत. मात्र, या गंभीर समस्येवर तोडगा काढण्याऐवजी महावितरणच्या शृंगारतळी कार्यालयातील नवीन उपअभियंत्यांनी ग्राहकांना जी उद्धट उत्तरे दिली आहेत, त्यामुळे आता लोकांच्या संतापाचा कडाडला आहे.
वीज गुल, पाणी बंद आणि मोबाईल नेटवर्कही गायब!
गेल्या पाच दिवसांपासून वीज नसल्याने ग्रामीण भागातील जीवन पूर्णपणे विस्कळीत झाले आहे. विजेअभावी गावागावांतील शासकीय पाणी पुरवठा योजना पूर्णपणे बंद पडल्या आहेत. परिणामी, ऐन पावसाळ्यात किंवा उन्हाळ्यात नागरिकांना पाण्यासाठी वणवण भटकावे लागत आहे. इतकेच नाही तर वीज नसल्याने परिसरातील बीएसएनएल (BSNL) मोबाईल टॉवरचा बॅकअप संपला असून तेही बंद पडले आहेत. त्यामुळे संपूर्ण संपर्क यंत्रणा कोलमडली असून नातेवाईकांशी संपर्क साधणेही कठीण झाले आहे. त्यातच वारंवार येणाऱ्या हाय-व्होल्टेज आणि लो-व्होल्टेजच्या झटक्यांमुळे नागरिकांचे फ्रीज, टीव्ही यांसारखी महागडी विद्युत उपकरणे जळून खाक होत आहेत.
“मी लाईन फॉल्ट काढायला जाऊ काय?” अधिकाऱ्याची अरेरावी
कोतळूक भागामध्ये मंगळवारी असाच सलग तीन दिवस वीज नसल्याचा प्रकार सुरू होता. अखेर संतापलेले कोतळूकचे उपसरपंच आणि भाजपा गुहागर तालुका सरचिटणीस सचिन ओक यांनी थेट शृंगारतळी कार्यालयातील उपअभियंत्यांना फोन लावला. ओक यांनी विचारले, “साहेब, सलग ३ दिवस वीज का नाहीये? लाईनमध्ये काय फॉल्ट आहे?”
यावर समोरील जबाबदार अधिकाऱ्याने उत्तर देण्याऐवजी थेट उडवाउडवीची भाषा केली. ते म्हणाले, “मी लाईन फॉल्ट काढायला जाऊ काय? तुमच्या भागातल्या लाईनमनला विचारा काय झाले ते. दिवसातून १०० जणांना मी हेच सांगत बसू काय?” एवढे बोलून त्या उपअभियंत्यांनी फोन कट केला आणि त्यानंतर वारंवार फोन करूनही त्यांनी प्रतिसाद दिला नाही. एका लोकप्रतिनिधीला आणि ग्राहकाला अशी वागणूक मिळाल्याने महावितरणच्या हुकूमशाही वृत्तीवर आता तीव्र आक्षेप घेतला जात आहे.
वरिष्ठ अधिकाऱ्यांकडून समज, पण नागरिक ‘कोकणी हिसका’ दाखवण्याच्या तयारीत!
या प्रकारानंतर सचिन ओक यांनी थेट महावितरणचे गुहागर मुख्य अभियंता सूद यांच्याशी संपर्क साधून या बेजबाबदार अधिकाऱ्याचा पाढा वाचला. तसेच पंचायत समिती सभापती प्रणव पोळेकर आणि उपसभापती नीलेश सुर्वे यांनाही या घटनेची माहिती दिली. घटनेचे गांभीर्य ओळखून उपसभापती नीलेश सुर्वे यांनी तातडीने संबंधित उपअभियंत्याची कानउघाडणी केली असून, आपल्या कामकाजात आणि ग्राहकांशी बोलण्याच्या वर्तणुकीत सुधारणा करण्याची तंबी दिली आहे.
परंतु, महावितरणच्या या गलथान कारभारामुळे नागरिक अत्यंत संतप्त झाले आहेत. उपअभियंत्यांनी आपली कार्यपद्धती बदलली नाही आणि वीज पुरवठा सुरळीत केला नाही, तर त्यांना कार्यालयात जाऊन ‘कोकणी हिसका’ दाखवू, असा थेट इशारा आता लोकप्रतिनिधी आणि ग्रामस्थांनी दिला आहे.
