रत्नागिरी / संगमेश्वर: रत्नागिरी जिल्ह्यातील संगमेश्वर तालुक्यातील ताम्हाणे पंचक्रोशीत सरकारी दूरसंचार कंपनी असणाऱ्या ‘बीएसएनएल’च्या (BSNL) नेटवर्क सेवेचा गेल्या काही दिवसांपासून मोठा खेळखंडोबा सुरू आहे. गावात मोबाईल टॉवर उभा असूनही मोबाईलमध्ये नेटवर्कची एक कांडीही दिसत नसल्याने, “गावात टॉवर नेमका कशासाठी उभा केला आहे?” असा संतप्त सवाल आता स्थानिक ग्राहक उपस्थित करत आहेत. या लहरी नेटवर्क सेवेमुळे ग्रामस्थ, व्यापारी आणि विशेषतः विद्यार्थ्यांचे मोठे शैक्षणिक व दैनंदिन नुकसान होत आहे.
नेमकी समस्या काय?
ताम्हाणे पंचक्रोशीसह साडवली आणि लगतच्या ग्रामीण भागामध्ये बीएसएनएलचे नेटवर्क वारंवार खंडित होण्याचे प्रमाण वाढले आहे. अनेकदा दिवसभरात कित्येक तास फोन लागत नाहीत, इंटरनेट चालत नाही आणि महत्त्वाच्या कामांच्या वेळी संपर्क तुटतो. आधुनिक डिजिटल युगात ऑनलाईन कामे, बँकिंग व्यवहार आणि शालेय-महाविद्यालयीन अभ्यास या सर्वांसाठी अखंड इंटरनेटची गरज असते; मात्र बीएसएनएलच्या या लहरी कारभारामुळे नागरिकांना प्रचंड मानसिक मनस्ताप सहन करावा लागत आहे.
नाईलाजाने खाजगी कंपन्यांचा आधार; खिशाला बसतोय कात्री
ग्रामीण भागात आजही सरकारी कंपनी म्हणून बीएसएनएलवर सर्वसामान्य जनतेचा मोठा विश्वास आहे. मात्र, वारंवार निर्माण होणाऱ्या तांत्रिक बिघाडामुळे ग्राहकांचा हा विश्वास डळमळीत होत आहे.
सततच्या या नेटवर्क समस्येमुळे हैराण झालेल्या ग्राहकांना नाईलाजाने इतर खाजगी दूरसंचार कंपन्यांची सिमकार्डे वापरावी लागत आहेत. खाजगी कंपन्यांचे रिचार्ज दर दिवसेंदिवस महाग होत चालले असून, आधीच बीएसएनएलचे रिचार्ज केलेले असताना केवळ कनेक्टिव्हिटी मिळवण्यासाठी जादा पैसे मोजून खाजगी कंपन्यांचे महागडे प्लॅन घ्यावे लागत आहेत. यामुळे ग्रामीण भागातील जनतेला नाहक आर्थिक भुर्दंड सहन करावा लागत आहे.
नेटवर्क यंत्रणा त्वरित सुरळीत करण्याची मागणी
ग्रामीण भागातील डिजिटल संपर्क यंत्रणा बळकट करण्याच्या घोषणा कागदावरच राहत असल्याचा प्रत्यय सध्या ताम्हाणेवासीय घेत आहेत. या पार्श्वभूमीवर, बीएसएनएलच्या वरिष्ठ अधिकाऱ्यांनी व प्रशासनाने ताम्हाणे पंचक्रोशीतील नेटवर्क समस्येची तातडीने दखल घ्यावी, टॉवरमधील तांत्रिक त्रुटी दूर करून खंडित होणारी सेवा पूर्ववत व अखंडित करावी, अशी जोरदार मागणी स्थानिक ग्रामस्थांमधून केली जात आहे.
