खेड / रत्नागिरी: कोकण रेल्वे मार्गावरील अत्यंत वर्दळीचे व मध्यवर्ती केंद्र असलेल्या खेड रेल्वे स्थानकावर प्रवाशांच्या दृष्टीने महत्त्वाच्या असणाऱ्या द्रुतगती (Express) गाड्यांना थांबा मिळावा, अशी मागणी आता जोर धरू लागली आहे. या पार्श्वभूमीवर, ‘कोकण विकास समिती’च्या वतीने राज्याचे गृह (शहरे) राज्यमंत्री योगेश कदम यांची भेट घेऊन त्यांना यासंदर्भात सविस्तर निवेदन देण्यात आले असून, शासनाने रेल्वे प्रशासनाकडे तातडीने पाठपुरावा करण्याची विनंती करण्यात आली आहे.
लाखो प्रवाशांसाठी खेड हे मुख्य केंद्र
खेड रेल्वे स्थानक हे केवळ खेड शहरापुरते मर्यादित नसून, ते दापोली, मंडणगड या तालुक्यांसह लगतच्या अथांग ग्रामीण भागातील हजारो प्रवाशांसाठी मुख्य प्रवेशद्वार मानले जाते. पर्यटन, शिक्षण, नोकरी आणि व्यवसाय या निमित्ताने मुंबई, ठाणे तसेच गोव्याच्या दिशेने प्रवास करणाऱ्या नागरिकांची संख्या येथे प्रचंड मोठी आहे. मात्र, कोकण मार्गावरून धावणाऱ्या अनेक नामांकित व जलद गाड्यांना खेडमध्ये थांबा नसल्याने स्थानिक प्रवाशांना मोठा मनस्ताप सहन करावा लागत आहे.
नागरिकांची होणारी अडचण
सध्या अनेक महत्त्वाच्या एक्सप्रेस गाड्या खेड स्थानकावरून न थांबता पुढे निघून जातात. परिणामी, दापोली, मंडणगड व खेड परिसरातील प्रवाशांना चिपळूण किंवा थेट पनवेल, ठाणे अशा दूरच्या स्थानकांवर जाऊन गाडी पकडावी लागते. यामुळे प्रवाशांचा:
-
वेळ आणि पैशांचा अपव्यय होतो,
-
रात्रीच्या वेळी अथवा आपत्कालीन स्थितीत प्रवास करताना महिला, ज्येष्ठ नागरिक आणि रुग्णांची मोठी शारीरिक गैरसोय होते.
‘या’ प्रमुख गाड्यांना थांब्याची मागणी
कोकण विकास समितीचे संस्थापक अध्यक्ष जयवंत दरेकर यांच्या नेतृत्वाखालील शिष्टमंडळाने ना. योगेश कदम यांची भेट घेतली. प्रवाशांच्या हिताचा विचार करून खालील महत्त्वाच्या गाड्यांना खेड स्थानकात प्रायोगिक तत्त्वावर किमान २ मिनिटांचा थांबा देण्यात यावा, अशी मागणी निवेदनात करण्यात आली:
-
सीएसएमटी – मडगाव जनशताब्दी एक्स्प्रेस
-
एलटीटी – कोचुवेली गरीबरथ एक्स्प्रेस
-
हजरत निजामुद्दीन – मडगाव गोवा संपर्क क्रांती एक्स्प्रेस
-
एलटीटी – करमाळी एसी सुपरफास्ट एक्स्प्रेस
रेल्वे मंत्रालय व बोर्डाकडे पाठपुराव्याची अपेक्षा
दापोली-खेड-मंडणगड विधानसभा मतदारसंघातील नागरिकांची वर्षानुवर्षे चालत आलेली ही गैरसोय दूर करण्यासाठी स्थानिक लोकप्रतिनिधी आणि राज्य शासनाचा हस्तक्षेप आवश्यक आहे. त्यामुळे ना. योगेश कदम यांनी या लोकहितार्थ विषयात जातीने लक्ष घालून केंद्रीय रेल्वे मंत्रालय, रेल्वे बोर्ड आणि कोकण रेल्वे महामंडळाकडे (KRCL) राज्य सरकारच्या वतीने विशेष पाठपुरावा करावा, अशी आशा कोकण विकास समिती व स्थानिक रेल्वे प्रवाशांनी व्यक्त केली आहे.
