रत्नागिरी: बँकिंग क्षेत्रातील वाढता ताण, कर्मचाऱ्यांचे मानसिक व शारीरिक आरोग्य आणि कार्यक्षम ग्राहक सेवा यांसाठी दीर्घकाळापासून प्रलंबित असलेला ‘५ दिवसांचा आठवडा’ (5-Day Work Week) त्वरित लागू करावा, या मागणीसाठी रत्नागिरीतील बँक कर्मचाऱ्यांनी आक्रमक भूमिका घेतली आहे. ‘युनायटेड फोरम ऑफ बँक युनियन्स’च्या (UFBU) नेतृत्वाखाली रत्नागिरीतील बँक कर्मचारी आणि अधिकाऱ्यांनी एकत्र येत जोरदार निदर्शने केली.
शहरातील बँक ऑफ इंडियाच्या विभागीय कार्यालयासमोर हे आंदोलन पार पडले. या वेळी विविध राष्ट्रीयीकृत तसेच खासगी बँकांमधील कर्मचारी आणि अधिकारी मोठ्या संख्येने उपस्थित होते. आपल्या न्याय्य हक्कांसाठी कर्मचाऱ्यांनी दिलेल्या घोषणांनी परिसर दुमदुमून गेला.
‘इतर क्षेत्रांत ५ दिवस, मग बँकांनाच ६ दिवस का?’
आंदोलनादरम्यान कर्मचाऱ्यांनी प्रशासकीय भेदभावावर तीव्र नाराजी व्यक्त केली. सध्या रिझर्व्ह बँक ऑफ इंडिया (RBI), भारतीय आयुर्विमा महामंडळ (LIC) व इतर विमा क्षेत्रे, तसेच केंद्र व राज्य शासनाच्या विविध विभागांमध्ये ५ दिवसांचा कामाचा आठवडा यशस्वीपणे राबवला जात आहे. याच धर्तीवर आंतरराष्ट्रीय वित्तीय बाजारपेठांप्रमाणे देशभरातील बँकांमध्येही ५ दिवसांचे कामकाज लागू करणे सहज शक्य आहे. मग केवळ सार्वजनिक व व्यावसायिक बँकांमधील कर्मचाऱ्यांवरच ६ दिवसांच्या कामाचा बोजा का, असा सवाल आंदोलक कर्मचाऱ्यांनी उपस्थित केला.
केवळ सुट्टी नव्हे, तर दर्जेदार सेवेसाठी आवश्यक
कर्मचाऱ्यांच्या मते, ५ दिवसांच्या आठवड्याची मागणी ही निव्वळ अतिरिक्त सुट्टी मिळवण्यासाठी नाही, तर वाढत्या कामाच्या व्यापात ‘वर्क-लाइफ बॅलन्स’ (Work-Life Balance) साधण्यासाठी अत्यंत गरजेची आहे. दोन दिवसांच्या साप्ताहिक सुट्टीमुळे कर्मचाऱ्यांना ताजेतवाने होऊन नव्या ऊर्जेने काम करता येईल, ज्यामुळे ग्राहकांना अधिक गतिमान आणि गुणवत्तापूर्ण सेवा देणे शक्य होईल.
बँकिंग क्षेत्रातील ही जुनी मागणी शासन व संबंधित प्रशासनाने कोणत्याही विलंबाविना तातडीने मंजूर करावी, अशी आग्रही मागणी या वेळी करण्यात आली.
या यशस्वी आंदोलनाचे नेतृत्व आणि संयोजन किरण खोपडे, मनोज लिंगायत व रोहित सुर्वे यांनी केले.
