गुहागर / प्रतिनिधी: कोकणात गणेशोत्सव म्हटला की लालपरी आणि चाकरमानी यांचे एक अतूट नाते पाहायला मिळते. लाडक्या बाप्पाच्या आगमनासाठी अवघे काही दिवस शिल्लक असतानाच, कोकणात जाण्यासाठी आणि सण संपवून परतीच्या प्रवासासाठी मुंबई-पुण्यातील चाकरमान्यांची लगबग शिगेला पोहोचली आहे. यंदाही या उत्साहाचे प्रतिबिंब एसटी आरक्षणावर स्पष्ट उमटले असून, गणेशोत्सवाच्या २० दिवस आधीच गुहागर आगारातील तब्बल १७३ बसेसचे आरक्षण हातोहात ‘फुल्ल’ झाले आहे. प्रवाशांचा वाढता ओघ लक्षात घेता, यंदा गुहागर आगारातून एकूण गाड्यांचे बुकिंग ४०० चा टप्पा ओलांडेल, असा अंदाज वर्तवण्यात येत आहे.
ग्रुप बुकिंगला चाकरमान्यांची पहिली पसंती
आपल्या वाडी-वस्तीवर एकत्र जाण्यासाठी कोकणी बांधव नेहमीच ग्रुप बुकिंगला पसंती देतात. उपलब्ध आकडेवारीनुसार, आतापर्यंत १७३ बसेसपैकी तब्बल १३३ बसेसचे ग्रुप बुकिंग (गट आरक्षण) पूर्ण झाले आहे, तर ३५ बसेसचे वैयक्तिक आगाऊ आरक्षण प्रवाशांनी केले आहे. १९ ते २१ सप्टेंबर या काळात प्रवाशांची सर्वात मोठी गर्दी होणार असून, यासाठी आगाराने खास नियोजन आखले आहे.
प्रमुख शहरांशी जोडणाऱ्या जादा गाड्या सज्ज
वाहतूक नियंत्रक स्वप्नील शिंदे यांनी दिलेल्या माहितीनुसार, चाकरमान्यांचा प्रवास सुखकर व्हावा यासाठी मुंबई, ठाणे आणि पुणे परिसरातील प्रमुख स्थानकांसाठी विशेष जादा फेऱ्यांचे नियोजन करण्यात आले आहे. यामध्ये प्रामुख्याने:
-
विरार व बोरिवली
-
भांडुप
-
विठ्ठलवाडी व कल्याण
-
चिंचवड आणि स्वारगेट (पुणे)
या प्रमुख मार्गांवर प्रवाशांच्या सोयीसाठी एसटीच्या जादा गाड्या सोडण्यात येणार आहेत.
ताफ्यात दाखल झाल्या १० नवीन बसेस; प्रवाशांचा प्रवास होणार आरामदायक
गुहागर आगारात सध्या ६१ बसेस उपलब्ध असून, त्यापैकी १५ बसेस या लांब पल्ल्याच्या प्रवासासाठी अत्यंत सुस्थितीत आणि उच्च गुणवत्तेच्या आहेत. त्यातच आगाराच्या ताफ्यात नव्याने दाखल झालेल्या १० नवीन कोऱ्या बसेसमुळे प्रवाशांचा लांब पल्ल्याचा प्रवास अधिक सुखकर, आरामदायी आणि सुरक्षित होणार आहे.
यंदा गाड्यांची संख्या वाढणार; प्रशासनाचे बुकिंगचे आवाहन
गेल्या वर्षी गणेशोत्सवात गुहागर आगारातून एकूण ३७३ बसेसचे बुकिंग झाले होते. त्यासाठी वरिष्ठ पातळीवरून आगाराला ३५० जादा गाड्या पुरवण्यात आल्या होत्या. यंदा चाकरमान्यांचा प्रतिसाद पाहता ही मागणी आणखी वाढणार असून, तब्बल ४०० हून अधिक गाड्या रस्त्यावर धावतील असा अंदाज आहे. त्यानुसार वरिष्ठ विभागाकडून अतिरिक्त गाड्या उपलब्ध करून घेण्याची प्रक्रिया वेगाने सुरू आहे.
प्रवाशांनी खासगी गाड्यांच्या चढ्या दरांना बळी न पडता एसटी महामंडळाच्या सुरक्षित आणि अधिकृत सेवेचा वेळेत लाभ घ्यावा, असे आवाहन गुहागर आगार प्रशासनाकडून करण्यात आले आहे.
