रत्नागिरी: सार्वजनिक रस्त्यांवर मनमानी पद्धतीने वाहने पार्क करून इतर प्रवाशांची वाट अडवणाऱ्या चालकांवर आता पोलिसांनी थेट कायदेशीर कारवाईचा बडगा उगारला आहे. रत्नागिरी जिल्ह्यात सार्वजनिक रस्त्यांवर रहदारीस गंभीर अडथळा निर्माण करणाऱ्या आणि अपघाताला निमंत्रण देणाऱ्या बेजबाबदार वाहनचालकांविरोधात पोलिसांनी विशेष मोहीम हाती घेतली असून, याप्रकरणी जयगड, रत्नागिरी शहर आणि ग्रामीण पोलीस ठाण्यांच्या हद्दीत एकूण चार वाहनचालकांवर गुन्हे नोंदवण्यात आले आहेत.
जयगडमध्ये रिक्षाचालकावर कारवाई
जयगड–रत्नागिरी मार्गावरील वरवडे फाटा येथे सार्वजनिक रस्त्यावर वाहतुकीला थेट अडथळा ठरेल अशा रितीने रिक्षा (क्र. MH-08-BC-5265) उभी करण्यात आली होती. यामुळे ये-जा करणाऱ्या इतर वाहनांना अडचण निर्माण होत असल्याचे लक्षात येताच, जयगड पोलिसांनी तत्परतेने पाऊल उचलले. रिक्षाचालक अब्दुलरहमान दिलावर मुजावर (वय ४०, रा. शिवखोल, रत्नागिरी) याच्याविरोधात जयगड पोलीस ठाण्यात गुन्हा दाखल करण्यात आला.
रत्नागिरी शहरात दोन टेम्पो चालकांवर गुन्हे
शहरातील वर्दळीचे केंद्र मानल्या जाणाऱ्या मारुती मंदिर सर्कल, साळवी स्टॉप तसेच जे. के. फाईल्स ते शिवाजीनगर या मुख्य रस्त्यांवर निष्काळजीपणे वाहने उभी करणाऱ्यांवर शहर पोलिसांनी कारवाईचा फास आवळला.
-
मिरजोळे एमआयडीसी परिसरातील रहिवासी सलमान सय्यदुद्दीन शेख (वय ३६) याने आपला टेम्पो (क्र. MH-08-AP-2665) रस्त्यात अडथळा होईल असा उभा केला होता.
-
कासारवेली येथील मंगेश दत्ताराम करंजवकर (वय ५६) यांनीही आपला टेम्पो (क्र. MH-08-AP-3861) मुख्य मार्गावर बेजबाबदारपणे उभा करून रहदारीची कोंडी केली होती.
या दोन्ही प्रकरणांत वाहतुकीची कोंडी व पादचाऱ्यांची गैरसोय लक्षात घेऊन शहर पोलिसांनी दोघांवर स्वतंत्र गुन्हे दाखल केले.
पाली एसटी स्टँडसमोर ग्रामीण पोलिसांची कारवाई
ग्रामीण भागातील मुख्य केंद्र असलेल्या पाली एसटी स्टँडसमोरील रस्त्यावर बेशिस्तपणे वाहन उभे करून एसटी बसेस आणि नागरिकांच्या वाहतुकीत खोळंबा निर्माण केल्याप्रकरणी पाली बाजारपेठेतील भिमाशंकर तुळजाराम गोंधळी (वय ४३) याच्याविरोधात रत्नागिरी ग्रामीण पोलिसांनी गुन्हा नोंदवला आहे.
नियम मोडणाऱ्यांना पोलिसांचा इशारा
मुख्य रस्ते, बाजारपेठा आणि बसस्थानकांसारख्या गर्दीच्या ठिकाणी वाहने वाटेल तशी उभी केल्यामुळे वारंवार वाहतूक कोंडी होते व पादचाऱ्यांच्या जिवाला धोका संभवतो. त्यामुळे अशा निष्काळजी चालकांवर यापुढेही गुन्हे दाखल करण्याची कठोर मोहीम सुरूच राहील, असा स्पष्ट इशारा पोलिसांनी दिला आहे.
