रत्नागिरी : आपल्याच जिल्ह्यात, घराच्या जवळ मानाची आणि हक्काची नोकरी मिळावी, हे प्रत्येक कोकणी तरुणाचे स्वप्न असते. हेच स्वप्न प्रत्यक्षात आणण्यासाठी रत्नागिरी जिल्हा प्रशासनाने उचललेले पाऊल अत्यंत यशस्वी ठरले आहे. महाराष्ट्र शासनाच्या कौशल्य, रोजगार, उद्योजकता व नाविन्यता विभागाच्या वतीने १ ऑक्टोबर रोजी जिल्ह्यात भव्य ‘रोजगार महाकुंभ’ आयोजित करण्यात आला होता. या उपक्रमांतर्गत एकाच दिवशी तब्बल १७२ पात्र तरुण-तरुणींना थेट नामांकित कंपन्यांची नियुक्तीपत्रे (Offer Letters) सुपूर्द करण्यात आली.
१४ केंद्रांवर मुलाखतींचा महामेळावा
स्थानिक सुशिक्षित, कुशल आणि अर्धकुशल युवकांना रोजगाराची संधी मिळावी आणि स्थानिक उद्योगांना आवश्यक ते मनुष्यबळ उपलब्ध व्हावे, या हेतूने जिल्हाभरात एकाच वेळी १४ वेगवेगळ्या केंद्रांवर हे रोजगार मेळावे पार पडले. या विशेष मोहिमेचे मुख्य उद्घाटन रत्नागिरी येथील गोगटे-जोगळेकर महाविद्यालयात जिल्हाधिकारी मनुज जिंदल यांच्या हस्ते उत्साहात संपन्न झाले.
१११ कंपन्या आणि २,६०० हून अधिक पदे
या रोजगार महाकुंभाचे वैशिष्ट्य म्हणजे यामध्ये नामांकित बहुराष्ट्रीय कंपन्यांपासून ते स्थानिक लघू व मध्यम उद्योगांपर्यंत एकूण १११ उद्योजकांनी सहभाग नोंदवला होता. विविध तांत्रिक, कार्यालयीन आणि व्यवस्थापकीय अशा एकूण २,६१२ रिक्त पदांसाठी भरती प्रक्रिया राबवण्यात आली.
जिल्ह्यातील विविध भागांतून आलेल्या तब्बल १,६४० उमेदवारांनी प्रत्यक्ष उपस्थित राहून या मुलाखती दिल्या. कंपन्यांच्या प्रतिनिधींनी घेतलेल्या प्राथमिक चाळणीत ४३३ उमेदवारांची प्राथमिक निवड करण्यात आली. त्यानंतर अंतिम फेरीत कौशल्य आणि पात्रतेच्या निकषांवर १७२ उमेदवारांना जागेवरच नियुक्तीपत्रे देऊन त्यांच्या करिअरची नवी सुरुवात करून देण्यात आली.
तरुणाईच्या चेहऱ्यावर समाधानाचे हास्य
परजिल्ह्यात किंवा महानगरांमध्ये न जाता थेट आपल्याच जिल्ह्यात नामांकित कंपन्यांमध्ये मुलाखत देण्याची आणि त्याच दिवशी हातात नोकरीचे पत्र मिळण्याची ही संधी तरुणांसाठी अत्यंत दिलासादायक ठरली. या उपक्रमाबद्दल सहभागी उमेदवारांनी समाधान व्यक्त केले असून, प्रशासनाच्या या प्रयत्नांचे सर्वच स्तरांतून कौतुक होत आहे, अशी माहिती जिल्हा कौशल्य विकास, रोजगार व उद्योजकता मार्गदर्शन केंद्राचे सहायक आयुक्त दत्ता चव्हाण यांनी दिली.
