लांजा: देवरुख-लांजा मार्गावर प्रवाशांच्या अंगाचा थरकाप उडवणारी एक अत्यंत दुर्दैवी घटना समोर आली आहे. लांजा तालुक्यातील केळंबे विभुते स्टॉपजवळ एका भरधाव एसटी बसने समोरील रिक्षाला जोरदार धडक दिली. या भीषण अपघातात रिक्षाचा अक्षरशः चक्काचूर झाला असून रिक्षाचालकासह त्यांच्या कुटुंबातील एका दोन वर्षांच्या चिमुकल्यासह तिघे जण गंभीर जखमी झाले आहेत.
नेमकी कशी घडली घटना?
मिळालेल्या माहितीनुसार, हा अपघात १८ जुलै रोजी सकाळी १० वाजेच्या सुमारास घडला. एसटी बस (क्रमांक MH 12 BT 2667) घेऊन चालक विश्वास कनावजे हा देवरुख-साखरपा-कोर्ले मार्गे लांजाच्या दिशेने जात होता. केळंबे विभुते स्टॉपजवळ रस्ता व परिस्थितीचा अंदाज न घेता बस अत्यंत बेदरकारपणे आणि अविचाराने चालवली जात होती.
उलट्या बाजूने लांज्याहून विवलीच्या दिशेने जाणारी रिक्षा (क्रमांक MH 08 AQ 1890) या स्टॉपजवळ पोहोचली असता, भरधाव एसटीने रिक्षाला समोरून जोरदार धडक दिली. धडक इतकी भीषण होती की रिक्षातील प्रवासी रक्ताच्या थारोळ्यात पडले आणि रिक्षाचे मोठे नुकसान झाले.
अपघातातील जखमींची नावे:
अपघातात जखमी झालेले सर्वजण लांजा येथील ‘वैभव वसाहत’ भागातील रहिवासी आहेत: १. प्रशांत नारायण वाघधरे (वय ६५ वर्षे) २. सौ. पल्लवी प्रशांत वाघधरे (वय ६० वर्षे) ३. पार्थ पारीतोष वाघधरे (वय अवघे २ वर्षे)
एसटी बसचालकावर गुन्हा दाखल
अपघातानंतर स्थानिक नागरिकांनी तातडीने जखमींना उपचारासाठी रुग्णालयात दाखल केले. याप्रकरणी लांजा पोलीस ठाण्यात नोंदवलेल्या कागदपत्रांच्या व तपासाच्या आधारे २३ जुलै रोजी सायंकाळी एसटी बसचालक विश्वास कनावजे याच्यावर गुन्हा दाखल करण्यात आला आहे.
भारतीय न्यायसंहिता (BNS) २०२३ चे कलम २८१, १२५(अ), १२५(ब) तसेच मोटार वाहन कायद्याच्या कलम १८४ अंतर्गत हा गुन्हा नोंदवण्यात आला असून लांजा पोलीस या अपघाताचा पुढील सविस्तर तपास करत आहेत.
