राजापूर: राजापूर तालुक्यातील केळवली फाट्यानजीक असणाऱ्या जामदे पुलाजवळ एसटी बस आणि स्विफ्ट डिझायर कार यांच्यात समोरासमोर जोरदार धडक होऊन भीषण अपघात झाला. हा अपघात शनिवारी सकाळी ७ वाजण्याच्या सुमारास घडला. एसटीने कारला धडक दिल्यानंतर काही अंतर फरफटत नेले, ज्यामुळे कारचा अक्षरशः चक्काचूर झाला आहे. सुदैवाने, कारचालकाने ऐनवेळी दाखवलेल्या प्रसंगावधानामुळे मोठी जीवितहानी टळली असली, तरी कारमधील तीन तरुण गंभीर जखमी झाले आहेत.
प्रवासादरम्यान वळणावर घडली घटना
सिंधुदुर्ग जिल्ह्यातील देवगड तालुक्यातील शिरगाव येथील अमित रमेश साटम हे आपल्या मित्रांसह स्विफ्ट डिझायर कारने (क्रमांक: MH 07 BG 9097) केळवली-पाचल मार्गे अणुस्कुरा घाटातून पुण्याच्या दिशेने निघाले होते. त्याच वेळी कणकवली आगाराची भुईबावडा-रिंगेवाडी-खारेपाटण ही एसटी बस (क्रमांक: MH 20 BL 3079) वैभववाडीच्या दिशेने येत होती.
केळवली फाट्यावरील एका धोकादायक वळणावर एसटी चालक गणपती भाऊसाहेब जाधव (वय ४७) यांनी रस्त्याचा व वळणाचा अंदाज न घेता बस भरधाव वेगाने चालवली. त्यामुळे समोरून येणाऱ्या कारला एसटीने जोरदार धडक दिली. धडक इतकी भीषण होती की बस कारला काही अंतरापर्यंत फरफटत घेऊन गेली.
तिघे जण जखमी; प्राथमिक आरोग्य केंद्रात उपचार
या अपघातात कारमधील पुढील तिघे जण जखमी झाले आहेत:
-
युधीराज भिकाजी राणे (वय ३२ वर्षे, रा. शिरगाव, देवगड)
-
विघ्नेश रामदास म्हाळवदे (वय २५ वर्षे, रा. शिरगाव, देवगड)
-
राज रामदास म्हाळवदे (वय २२ वर्षे, रा. शिरगाव, देवगड)
अपघाताची माहिती मिळताच राजापूर पोलीस ठाण्याचे पोलीस निरीक्षक अमित यादव व पोलीस हेडकॉन्स्टेबल रहीम मुजावर यांनी तातडीने घटनास्थळी धाव घेतली. त्यांनी स्थानिक नागरिकांच्या मदतीने जखमींना तातडीने जवळच्या प्राथमिक आरोग्य केंद्रात उपचारासाठी दाखल केले.
अधिकाऱ्यांकडून पाहणी व गुन्हा दाखल
घटनेची माहिती मिळताच राजापूर आगार प्रमुख काव्या पेडणेकर, वाहतूक नियंत्रक अजय सिडाम तसेच सिंधुदुर्गचे विभागीय वाहतूक अधीक्षक निलेश लाड यांनी अपघातस्थळी भेट देऊन परिस्थितीची पाहणी केली. या धडकेत एसटी बसचे सुमारे ४० हजार रुपयांचे तर कारचे सुमारे ६० हजार रुपयांचे नुकसान झाले आहे.
कारचालक अमित रमेश साटम यांच्या तक्रारीवरून राजापूर पोलिसांनी एसटी चालक गणपती जाधव यांच्याविरोधात भारतीय न्याय संहिता (BNS) कलम २८१, १२५ (अ) आणि मोटार वाहन कायदा कलम १८४ अंतर्गत गुन्हा दाखल केला असून या प्रकरणाचा पुढील तपास सुरू आहे.
