माखजन (रत्नागिरी): कोकणातील निसर्गरम्य संगमेश्वर तालुक्यातील धामापूर येथील प्रसिद्ध ‘श्री देव गणपती व श्री मारुती देवस्थान’ यंदा एका अत्यंत ऐतिहासिक आणि मंगलमय क्षणाचे साक्षीदार होत आहे. धामापूरच्या लाडक्या बाप्पाच्या स्थापनेला तब्बल २२५ वर्षे पूर्ण होत असून त्यानिमित्ताने ‘द्विशतकोत्तर रौप्यमहोत्सवी जन्मोत्सव सोहळा’ येत्या १२ ते १६ सप्टेंबर दरम्यान मोठ्या उत्साहात व भक्तिभावाने साजरा केला जाणार आहे. पाच दिवस चालणाऱ्या या उत्सवामुळे संपूर्ण माखजन परिसरामध्ये सध्या चैतन्यमय आणि मंगलमय वातावरण निर्माण झाले आहे.
या विशेष महोत्सवानिमित्त देवस्थानच्या वतीने विविध धार्मिक अनुष्ठाने, नामवंत कीर्तनकारांची कीर्तने, संगीत मैफल आणि सामाजिक उपक्रमांचे भव्य नियोजन करण्यात आले आहे.
पाच दिवसीय सोहळ्याची सविस्तर रूपरेषा:
-
पहिला दिवस (१२ सप्टेंबर – शुभारंभ व स्मरणिका प्रकाशन):
महोत्सवाचा प्रारंभ १२ सप्टेंबर रोजी सकाळी ७ वाजता श्रींच्या षोडशोपचार पूजेने होईल. त्यानंतर सकाळी ८ वाजता भाविकांच्या उपस्थितीत सत्यविनायक पूजा संपन्न होईल. सकाळी १०:३० वाजता या ऐतिहासिक महोत्सवानिमित्त तयार करण्यात आलेल्या ‘विशेष स्मरणिकेचे प्रकाशन’, मान्यवरांचा सत्कार व मनोगत सोहळा पार पडेल. रात्री १० ते ११ दरम्यान आरती, भोवत्या व मंत्रपुष्पांजली अर्पण केली जाईल. त्यानंतर रात्री ११ ते १:३० या वेळेत डोंबिवलीचे प्रसिद्ध कीर्तनकार ह.भ.प. श्री मोहकबुआ रायकर यांचे सुश्राव्य कीर्तन रंगेल.
-
दुसरा दिवस (१३ सप्टेंबर – कीर्तन सेवा):
सकाळी ८ वाजता श्रींची षोडशोपचार पूजा व विविध आवर्तने केली जातील. रात्री १० वाजता आरती झाल्यानंतर रात्री ११ ते १ या वेळेत रत्नागिरीच्या ह.भ.प. कु. तेजस्विनी जोशी यांचे हरिकीर्तन होणार आहे.
-
तिसरा दिवस (१४ सप्टेंबर – मुख्य जन्मोत्सव सोहळा):
हा दिवस उत्सवाचा मुख्य आकर्षणबिंदू असणार आहे. सकाळी ८ वाजता नित्य षोडशोपचार पूजा होईल. रात्री १० वाजता आरतीनंतर रात्री ११ ते १ या वेळेत धामणी येथील ह.भ.प. श्रीनिवास पेंडसे यांचे ओघवत्या वाणीतील ‘जन्मोत्सवाचे कीर्तन’ रंगेल. बरोबर मध्यरात्री १२:३० वाजता श्रींचा मुख्य जन्मोत्सव सोहळा अत्यंत दिमाखात, जयघोषात आणि भक्तिमय वातावरणात पार पडेल.
-
चौथा दिवस (१५ सप्टेंबर – जन्मोत्सव काला व ‘स्वररंग’ संगीत मैफल):
सकाळी ८ वाजता पूजा झाल्यानंतर सायंकाळी ५ ते ७ या वेळेत ‘जन्मोत्सव काला’ आणि पारंपरिक ‘काला रात्री’ कार्यक्रम होईल. रात्री १० ते १०:४५ आरती संपन्न होईल, तर १०:४५ ते ११:३० दरम्यान स्थानिक कीर्तनकार ह.भ.प. श्रीकांत फाटक (माखजन) यांचे कीर्तन होईल.
यानंतर रात्री ११:३० ते १:३० या वेळेत रसिकांसाठी ‘स्वररंग’ हा बहारदार भावगीत-भक्तिगीतांचा संगीत कार्यक्रम रंगणार आहे. यामध्ये गायक अमेय आकवे, गायिका प्राजक्ता लेले-जोगळेकर, संवादिनीवर चैतन्य पटवर्धन, तबल्यावर प्रथमेश शहाणे, तालवाद्यावर सुहास सोहनी साथसंगत करतील; तर कार्यक्रमाचे ओघवत्या शैलीत निवेदन अलका बेंदरकर करणार आहेत.
-
पाचवा दिवस (१६ सप्टेंबर – महाप्रसाद, विविध गुणदर्शन व सांगता):
सकाळी ८ वाजता षोडशोपचार पूजा झाल्यावर दुपारी १२:३० वाजता भाविकांसाठी भव्य ‘महाप्रसादाचे’ आयोजन करण्यात आले आहे. रात्री १० ते १२ दरम्यान आरती, भोवत्या आणि पुष्पांजली अर्पण केली जाईल. मध्यरात्री १२ ते २ दरम्यान स्थानिक कलाकारांचा सहभाग असलेला ‘विविध गुणदर्शन’ कार्यक्रम रंगेल. पहाटे २ वाजता ह.भ.प. श्रीकांत फाटक यांच्या लळीताच्या कीर्तनाने या भव्य द्विशतकोत्तर रौप्यमहोत्सवी सोहळ्याची पारंपरिक सांगता होईल.
या ऐतिहासिक व मंगलमय क्षणाचे साक्षीदार होण्यासाठी परिसरातील तसेच कोकणातील सर्व गणेशभक्तांनी मोठ्या संख्येने उपस्थित राहून दर्शनाचा व महाप्रसादाचा लाभ घ्यावा, असे आवाहन देवस्थान विश्वस्त व ग्रामस्थांच्या वतीने करण्यात आले आहे.
