संगमेश्वर: संगमेश्वर तालुक्यातील पांगरी परिसरातील ग्रामस्थ आणि शेतकरी सध्या महावितरणच्या लहरी आणि अत्यंत कमी दाबाच्या (Low Voltage) वीजपुरवठ्यामुळे प्रचंड अडचणीत सापडले आहेत. विजेच्या या सततच्या समस्येमुळे गावातील दैनंदिन व्यवहारांबरोबरच सार्वजनिक पिण्याच्या पाण्याच्या योजना पूर्णपणे कोलमडल्या आहेत. या गंभीर त्रासातून ग्रामस्थांची लवकरात लवकर सुटका व्हावी, यासाठी पांगरी ग्रामपंचायतीच्या वतीने पंचायत समिती सभापतींना निवेदन देऊन तातडीने उपाययोजना करण्याची मागणी करण्यात आली आहे.
घनदाट जंगलातील वीजवाहिनी आणि पावसाळ्यातील अंधार
पांगरी गावाला वीजपुरवठा करणारी महावितरणची मुख्य वाहिनी अतिशय दाट जंगलातून गेली आहे. पावसाळ्यात जोरदार वारे आणि वादळामुळे या वाहिनीवर वारंवार झाडे अथवा फांद्या कोसळतात. जंगल दुर्गम असल्याने तेथे जाऊन फांद्या छाटणे किंवा तुटलेल्या तारांची दुरुस्ती करणे महावितरणच्या कर्मचाऱ्यांसाठी मोठे आव्हानात्मक ठरते. परिणामी, पावसाळ्याच्या दिवसांत अनेक दिवस संपूर्ण गाव अंधारात चाचपडत असते. त्यातच नियमित मिळणारा वीजपुरवठाही अत्यंत कमी दाबाचा असल्याने घरातील उपकरणे तर बंद पडतातच, शिवाय शेती आणि पाण्याचे पंपही सुरू होत नाहीत.
पाणीपुरवठा योजनांना मोठा फटका
पांगरी येथील ‘कोंडवाडी पाणीपुरवठा योजने’साठी लगतच्या रत्नागिरी तालुक्यातील वेळवंड गावातून ‘थ्री-फेज’ (Three-Phase) लाईनद्वारे वीज पुरवली जाते. मात्र, सततच्या लो-व्होल्टेजमुळे या योजनेचे विद्युत पंप पूर्ण क्षमतेने चालू शकत नाहीत. यामुळे गावात पिण्याच्या पाण्याचे मोठे संकट उभे राहिले असून, महिलांना पाण्यासाठी वणवण करावी लागत आहे.
यावर कायमस्वरूपी उपाय म्हणून जंगलातून गेलेली जुनी लाईन बदलून, मोकळ्या डांबरी रस्त्यावरून नवीन वीजवाहिनी टाकणे गरजेचे बनले आहे. रस्त्यावरून वाहिनी गेल्यास भविष्यात देखभाल आणि दुरुस्तीची कामे तातडीने करणे शक्य होईल. यासाठी या मार्गाचे तात्काळ सर्वेक्षण करून जिल्हा वार्षिक नियोजन आराखड्यातून (DPDC) आवश्यक निधी मंजूर करावा, अशी आग्रही मागणी ग्रामस्थांकडून केली जात आहे.
“गावातील विस्कळीत वीजपुरवठ्यामुळे ग्रामस्थ आणि शेतकरी प्रचंड त्रासात आहेत. या संदर्भात पंचायत समिती सभापतींची भेट घेऊन सविस्तर निवेदन देण्यात आले आहे. सभापतींनी या समस्येची गांभीर्याने दखल घेतली असून, रत्नागिरी जिल्ह्याच्या पालकमंत्र्यांकडे तातडीने पत्रव्यवहार करून या कामासाठी निधी मिळवून देण्याचा सकारात्मक पाठपुरावा करण्याचे आश्वासन दिले आहे.”
— सुनील म्हादे (प्रशासक, पांगरी ग्रामपंचायत)
