दापोलीच्या मुरुड किनाऱ्यानजिक उभारण्यात आलेल्या वादग्रस्त साई रिसॉर्ट प्रकरणी आता दापोलीचे तत्कालीन प्रांताधिकारी जयराम देशपांडे यांना पोलिसांनी अटक केली आहे. न्यायालयाने त्यांची रवानगी ३ एप्रिलपर्यंत न्यायालयीन कोठडीत केली आहे. याआधी याप्रकरणी उद्योजक सदानंद कदम यांना ईडीने अटक केली होती. नियम धाब्यावर बसून साई रिसॉर्टला बिनशर्त परवानगी देण्यात आल्याचा ठपका जयराम देशपांडे यांच्यावर ठेवण्यात आला आहे.
देशपांडे यांना यापूर्वीच ईडीने ताब्यात घेतले होते, आता दापोली पोलिसांनी त्यांना अटक केली आहे. रायगड जिल्हा रोजगार हमीचे अधिकारी असलेले देशपांडे यांना साई रिसॉर्ट प्रकरणावरून सेवेतून निलंबित करण्यात आले होते. काही दिवसानंतर ईडीने त्यांना अटक केली होती. त्यांची सुटका होण्याआधीच आता दापोली पोलिसांनी त्यांना अटक केली आहे.