दापोली: सणासुदीचे दिवस सुरू असतानाच कोकणातील दापोली शहरात एसटी प्रवाशांना, विशेषतः महिला आणि ज्येष्ठ नागरिकांना एका गंभीर समस्येला सामोरे जावे लागत आहे. राज्य शासनाने एसटी प्रवासात ५० टक्के सवलतीसाठी ‘राष्ट्रीय समान वाहतूक कार्ड’ म्हणजेच NCMC (National Common Mobility Card) बंधनकारक केले आहे. मात्र, दापोली शहरात हे कार्ड मिळवून देणारे अधिकृत शासकीय केंद्र वारंवार बंद राहत असल्याने प्रवाशांची मोठी गैरसोय आणि ससेहोलपट होत असल्याचे समोर आले आहे.
दिवसभर प्रतीक्षा, तरीही काम अर्धवट
दापोली शहर आणि परिसरातील ग्रामीण भागातून अनेक नागरिक पहाटेपासून शासकीय केंद्रावर कार्ड काढण्यासाठी येत आहेत. महिला आणि वयोवृद्ध नागरिक तासन्तास रांगेत उभे राहतात. मात्र, केंद्र चालक कधी उशिरा येतात, तर कधी दिवसभर केंद्र उघडतच नाही. अनेकदा संपूर्ण दिवस रांगेत खर्ची घालूनही रिकाम्या हाताने परतावे लागत असल्याने प्रवाशांचा वेळ आणि येण्या-जाण्याचा खर्च पाण्यात जात आहे.
३१ ऑगस्टची मुदत आणि सणासुदीची चिंता
एसटी महामंडळाच्या नियमानुसार, ३१ ऑगस्टच्या मध्यरात्रीनंतर सवलतीचे तिकीट मिळवण्यासाठी NCMC कार्ड सक्तीचे करण्यात आले आहे. गौरी-गणपतीचा सण तोंडावर असताना गावोगावी प्रवास करणाऱ्या महिला प्रवाशांसाठी ही मोठी डोकेदुखी ठरली आहे. सवलतीचे तिकीट हवे असेल तर कार्ड आवश्यक, पण कार्ड काढायला गेले तर केंद्र बंद, अशी कोंडी नागरिकांची झाली आहे.
कार्ड मिळाले तरी संकट कायम: बसमध्ये स्वाईप होईना!
ज्या प्रवाशांनी रांगेत उभे राहून कसेबसे हे कार्ड मिळवले आहे, त्यांच्या अडचणी इथेच संपलेल्या नाहीत. एसटी बसमध्ये चढल्यानंतर वाहकांच्या हातातील ई-तिकीट मशीनमध्ये हे कार्ड ‘स्वाईप’ होत नसल्याच्या असंख्य तक्रारी येत आहेत. “कार्ड आहे पण मशिन चालत नाही”, अशा तांत्रिक कारणामुळे महिलांना पूर्ण भाड्याचे तिकीट काढावे लागत असून, शासनाच्या योजनेचा प्रत्यक्ष फायदा मिळणे कठीण झाले आहे.
खासगी केंद्रांची ‘चांदी’, २५० ते ३०० रुपयांची लूट
शासकीय केंद्रांची अनागोंदी आणि वाढती गर्दी पाहून काही खासगी केंद्रांनी प्रवाशांच्या गरजेचा गैरफायदा घेण्यास सुरुवात केली आहे. शासकीय नियमांनुसार नाममात्र किंवा मोफत असणाऱ्या या प्रक्रियेसाठी दापोलीत खासगी केंद्रांवर तब्बल २५० ते ३०० रुपयांपर्यंत अतिरिक्त रक्कम उकळली जात असल्याचा आरोप प्रवाशांनी केला आहे. शासनाची ५० टक्के सवलत मिळवण्यासाठी प्रवाशांना आधीच एवढा आर्थिक भार सहन करावा लागत असल्याने तीव्र संताप व्यक्त केला जात आहे.
प्रशासनाने तातडीने लक्ष घालण्याची मागणी
या संपूर्ण प्रकारामुळे ग्रामीण भागातील जनतेची लूट होत असून, एसटी महामंडळ आणि स्थानिक प्रशासनाने या प्रकरणात तातडीने हस्तक्षेप करावा अशी मागणी जोर धरत आहे. दापोलीतील शासकीय केंद्र सुरळीत व वेळेवर सुरू ठेवणे, बसमधील स्वाईपिंग मशिनमधील तांत्रिक त्रुटी दुरुस्त करणे आणि खासगी चालकांकडून होणारी बेकायदेशीर वसुली रोखण्यासाठी कडक पावले उचलावीत, अशी मागणी प्रवाशांमधून केली जात आहे.
