खेड-दापोली रस्त्यावरील जिजामाता भाजी मंडई खेड येथे शुक्रवारी रात्री २.३० च्या सुमारास सुमारे ९ फुट लांबीची महाकाय मगर आढळुन आली. पुराच्या पाण्यासोबत ही मगर वाहून आली होती. दीड तासाच्या अथक प्रयत्नाने वनविभाग वन्यजीव बचाव पथकाने या मगरीला सुरक्षितरीत्या पकडून नैसर्गिक अधिवासात मुक्त केले. मगर असल्याची बातमी पोलीस स्टेशन खेड यांचेकडून मिळाल्यानंतर वन विभागाचे वन्यजीव बचाव पथक खेड तात्काळ घटनास्थळी रवाना झाले. सुमारे ९ फुट लांबीची मगर मंडईच्या शेडमध्ये बसलेली होती. ही मगर खूपच मोठी असल्याने तिला पकडणे वन्यजीव बचाव पथकासमोर खूप मोठे आव्हान होते. विचार विनिमय व प्रत्यक्ष कार्यवाहीचे नियोजन करून, प्रत्येकावर कामगिरी सोपविणेत आली आणि प्रत्यक्ष बचाव कार्याला सुरुवात करणेत आली.
प्रथम मगरीच्या तोंडावर गोणता टाकणेत आला. मगरीला आजूबाजूचे दिसू नये हा उद्देश होता व तोच गोणता मगरीचे तोंडाला बांधणेत येणार होता. गोणता बरोबर मगरीच्या तोंडावर टाकल्याने मगरीला आजूबाजूचे दिसत नाही याची खात्री झाल्यानंतर चपळाईने मगरीवर जाळे टाकून सर्वांनी मगरीला चारही बाजूने धरून ठेवले व मगरीचे चारही पाय उचलून धरले. रस्सीच्या सहाय्याने मगरीचे तोंड व चारही पाय व्यवस्थित बांधणेत आले. मगर महाकाय व वजनशीर असलेने नगरपरिषद खेडने तात्काळ त्यांचा ट्रॅक्टर उपलब्ध करून दिला. जाळ्यासह मगरीला सुरक्षितरित्या उचलून ट्रॅक्टर मध्ये ठेवुन ट्रॅक्टर मधून मगरीला पशुवैद्यकीय अधिकारी यांचेकडून तपासणी करून घेवुन तिला नैसर्गिक अधिवासात मुक्त केले.
ही कामगिरी विभागीय वन अधिकारी रत्नागिरी (चिपळूण) दिपक खाडे, सहाय्यक वनसंरक्षक चिपळूण श्री. बोराटे, परिक्षेत्र वन अधिकारी दापोली प्रकाश पाटील यांच्या मार्गदर्शनाखाली वन्यजीव बचाव पथक खेडचे सुरेश उपरे, परिमंडळ वन अधिकारी खेड, राणबा बंबर्गेकर वनरक्षक खवटी, परमेश्वर डोईफोडे वनरक्षक तळे, अशोक ढाकणे वनरक्षक काडवली, प्रियंका कदम वनरक्षक आंबवली, श्री. छत्रपती वाईल्ड लाईफ फाउंडेशनचे सदस्य सर्वेश पवार, रोहन खेडेकर, श्वेत चोगले, सुरज जाधव, सुमित म्हाप्रळकर, यश खेडेकर, तसेच पोलीस स्टेशन खेड चे पोलीस अधिकारी या सर्वांनी मिळून पूर्ण केली.
